Олий таълим вазирига янги ўринбосарлар тайинланди

Аввалроқ, Олий таълим, фан ва инновациялар вазирининг биринчи ўринбосари ва вазирнинг инновация бўйича ўринбосари лавозимидан озод этилгани хабар қилинганди. Эндиликда уларнинг ўрнига янги ўринбосарлар тайинланди. Бу ҳақда ЎзА хабар берди.

Билдирилишича, Олий таълим, фан ва инновациялар вазирининг биринчи ўринбосари лавозимига Шоҳрух Ҳожиакбарович Далиев, Олий таълим, фан ва инновациялар вазирининг ўринбосари лавозимига эса Отабек Мухторович Маҳкамов тайинланди.

Маълумот учун, Шоҳрух Далиев шу пайтгача Вазирлар Маҳкамасининг таълим ва илм-фан масалаларига масъул департамент ва котибиятларида ўрта махсус, профессионал таълим, олий ва олий таълимдан кейинги таълим ҳамда олий таълим илм-фанини ривожлантириш бўйича бош мутахассис лавозимларида фаолият юритиб келаётганди. Отабек Маҳкамов эса бунга қадар Тошкент давлат юридик университети ҳамда Давлат бошқаруви академиясида узоқ йиллар кафедра мудири, декан каби лавозимларда ишлаган, сўнгги вақтларда Президент Администрациясида масъул лавозимларда ишлаётганди.