Самарқанд ҳайратлантирди – FIDE расмийси

FIDE расмийси Дана Рейзниесе Ўзбекистон мезбонлик қилаётган Шахмат олимпиадаси ташкилотчилигига юқори баҳо берди. У мусобақанинг биринчи куни белгиланган вақтда бошланганини алоҳида таъкидлаб, Самарқандда ташкилотчиликдаги самарадорлик яққол кўринаётганини айтди.

“Одатда биринчи куни турли майда масалалар пайдо бўлиб, мусобақа кечроқ бошланиб кетиши мумкин. Аммо Самарқандда бундай бўлмади. Ташкилотчиликдаги самарадорлик яққол кўриниб турибди”, дейди Дана Рейзниесе.

Шунингдек, у Олимпиада доирасида илк бор асосий мусобақа билан бир вақтда имконияти чекланган шахматчилар учун Паралимпиада ўтказилаётганини энг муҳим янгиликлардан бири сифатида қайд этди.

“Иштирокчилар сонининг рекорд даражада экани, юқори технологиялар – буларнинг барчаси жуда муҳим. Аммо, шахсан мен учун энг муҳим жиҳат – тарихда биринчи марта имконияти чекланган шахматчилар учун Паралимпиада асосий Шахмат олимпиадаси билан бир вақтда ташкил этилганидир. Биринчи марта буни айнан Ўзбекистон амалга оширяпти”, дейди у.

Дана Рейзниесе Ўзбекистонда шахматнинг тарихи ҳам узоқ даврларга бориб тақалишини айтди. Хусусан, Афросиёбдан VII–VIII асрларга оид қадимий шахмат доналари топилганини эслатди.

FIDE раҳбари шахматнинг таълимдаги аҳамиятига ҳам тўхталиб, уни XXI аср таълими учун самарали воситалардан бири деб атади. Унинг сўзларига кўра, шахмат болаларга келажакда муваффақият қозониш учун зарур бўлган кўникмаларни шакллантиришга ёрдам беради.

Шу билан бирга, Рейзниесе ижтимоий шахмат лойиҳаси доирасида шахмат инсонлар ҳаётини қандай ўзгартиргани ҳақида 50 дан ортиқ ҳикоя тўпланганини айтди. Уларнинг айримлари орасида ҳатто миясида жарроҳлик амалиёти ўтказилаётган пайтда рақиби билан шахмат ўйнаган инсон ҳақидаги ҳикоя ҳам бор.

FIDE раҳбари ўзи ҳам шахматчи ва гроссмейстер эканини таъкидлади. У бир нечта Жаҳон шахмат олимпиадаларида иштирок этганини айтиб, бу гал расмий шахс сифатида мусобақани кузатаётганидан кўра, шахматчилар сафида ўтиришни истаганини яширмади.

“Ўзим ҳам шахматчиман, гроссмейстерман. Бир нечта Жаҳон шахмат олимпиадаларида иштирок этганман. Шунинг учун бугун бу ерда шахматчи эмас, расмий шахс сифатида турганимга, ростини айтсам, ўйнаётган шахматчиларга ҳавасим келяпти. Чунки шундай ажойиб залда шахмат ўйнашни жуда истаган”, дейди Дана Рейзниесе.

Эслатиб ўтамиз, Шахмат олимпиадаси Ўзбекистонда ўтказилаётган FIDE’нинг йирик халқаро тадбирларидан бири ҳисобланади.