Очиқ мактуб: Зеленский Путинни “ринг”га чақирди

Украина Президенти Владимир Зеленский Россия Президенти Владимир Путинга очиқ мактуб йўллаб, тўғридан тўғри музокаралар жараёнини бошлаш ва давлат раҳбарларининг шахсий учрашувини ўтказишни таклиф қилди. Бу ҳақда Зеленский ўзининг Telegram-каналида ёзиб қолдирди.

Мактубда Зеленский бутун фронт чизиғи бўйлаб ўт очишни тўхтатиш ва давлат раҳбарларининг нейтрал ҳудудда учрашувини ташкил этишни таклиф қилган.

“Украина раҳбарига сизнинг пойтахтингизда, Россия раҳбарига эса Киевда иш йўқ. Уруш ва тинчлик масалаларини ҳал қилиш учун анъанавий равишда давлат раҳбарларини қабул қилиб келаётган мамлакатлар бор. Швейцария, Туркия ва араб давлатлари шулар жумласидандир. Айнан раҳбарлар асосий масалаларни ҳал қилади – бу ҳар доим шундай бўлган ва шундай бўлиб қолади”, деб ёзган Зеленский.

Унинг таъкидлашича, Украина дипломатик жараённи бошлаш учун ҳарбий ҳаракатларни тўлиқ тўхтатишга тайёр. Ўт очишни тўхтатиш режимига мониторинг ўрнатиш вазифасини эса АҚШ бажариши мумкин.

Мурожаатда Зеленский “ҳаммани ҳаммага” тамойили асосида асирлар алмашинувини ўтказиш, шунингдек олиб кетилган барча тинч аҳоли ва болаларни қайтаришни ҳам таклиф қилган.

Украина раҳбари май ойида Россия армияси 30 мингдан ортиқ ҳарбий хизматчисини йўқотганини, уларнинг 63 фоизи ҳалок бўлгани ва 37 фоизи оғир яраланганини иддао қилган. Шунингдек, у Россия жамияти бешинчи йил давом этаётган урушдан чарчаётганини таъкидлаган.

Зеленскийнинг сўзларига кўра, Киев Москванинг 2027–2028 йилларда ҳам урушни давом эттириш режалари ҳақида маълумотларга эга.

Украина Президенти, шунингдек, уруш Россия ҳудудига кўчирилганини, Путин эса ёрдам сўрашга мажбур бўлган биринчи Россия раҳбарига айланганини айтган. У Россия тарихида урушдан чарчаш сиёсий ўзгаришларга олиб келган ҳолатлар бўлганини эслатган.

Украина ташқи ишлар вазири Андрей Сибига мазкур мактуб дипломатик каналлар орқали расман ҳам етказилишини маълум қилган.

“Бу очиқ мактуб урушни тугатиш бўйича жиддий ва мазмунли таклифдир. Украина Президентидан Россия Федерацияси Президентига йўлланган, аниқ ва амалга ошириш мумкин бўлган қадамларни ўз ичига олган ҳамда шахсий учрашувга таклифдан иборат мурожаатдир”, деб ёзган Сибига.

Унинг қўшимча қилишича, Киев Москвадан ушбу таклифга мазмунли жавоб кутаётганини билдирган.

Эслатиб ўтамиз, жорий йилнинг 3 июнь куни Киевда НАТО бош котиби Марк Рютте билан қўшма матбуот анжуманида ҳам Украина Президенти Владимир Зеленский “дунёдаги барча низолар тугашини кутиб ўтирмаслик” учун Россия Президенти Владимир Путин билан тўғридан тўғри музокаралар ўтказишга тайёрлигини билдирганди.