Нукусдаги намойишлар ортидан 516 киши қўлга олинди

Жорий йилнинг 1-2 июль кунлари Қорақалпоғистонда содир бўлган намойишларда иштирок этганликда гумонланган 516 киши қўлга олинди. Бу ҳақда Миллий гвардия Ахборот хизмати раҳбари Даврон Жуманазаровнинг Фавқулодда ҳолат даврида Қорақалпоғистон Республикаси ҳудудининг комендатураси томонидан амалга оширилаётган ишлар юзасидан берган видеобаёнотида айтилади.

“Барчангизга маълум, жорий йил 3 июль куни соат 00:01 дан Қорақалпоғистон Республикасида фавқулодда ҳолат режими ўрнатилди. Фавқулодда ҳолат даврида соат 21:00 дан эрталаб 07:00 га қадар комендантлик соати жорий этилиб, ушбу даврда вақтинчалик чекловлар ўрнатилди. Олдин хабар берганимиздек, 2022 йилнинг 1-2 июль кунлари Нукус шаҳрида бир гуруҳ шахслар сохта шиорларни ўзига ниқоб қилиб олган ҳолда аҳоли ўртасида ўзларининг ғаразли ташвиқот ва ноқонуний ҳаракатлари билан шаҳар кўчаларига чиқишди ва ҳокимият вакилларининг қонуний талабларига бўйсунмасдан, тартибсизликлар келтириб чиқаришди. 

1-2 июль кунлари тартибсизликларда қатнашгани учун воқеа жойларида ушланган 516 нафар фуқаро Ички ишлар бошқармасига топширилди. Улар билан суриштирув ишлари олиб бориляпти. Суриштирув ишлари натижасида айримларга маъмурий чоралар қўлланилгандан сўнг қўйиб юборилмоқда”, дейди МГ вакили. 

Шунингдек, фармон билан фавқулодда ҳолат эълон қилинганидан сўнг, 3 июлдан 4 июлга ўтар кечаси комендантлик тартибини бузгани ва кўчаларда бемақсад юргани учун 110 нафар фуқаро ушланиб, ички ишлар идораларига топширилган. 12 та автотранспорт воситалари жарима майдонига жойлаштирилган. 

Нукус шаҳрида патруллик хизмати давомида комендантлик соатига риоя қилмаган 58 нафар шахслар ушланган. Шундан 28 нафар шахсларга Маъмурий жавобгарлик тўғрисидаги кодекснинг 204-моддаси – Фавқулодда ҳолат тартибининг талабларини бузиш бўйича маъмурий баённомалар расмийлаштирилган. Қолганлар билан профилактика суҳбатлари ўтказилиб, 07:00 дан кейин қўйиб юборилган.