Норчаевнинг “Брага”га трансфери барбод бўлди

Ўзбекистон миллий терма жамоаси ҳужумчиси Ҳусайн Норчаевнинг виза билан боғлиқ муаммо сабаб, Португалия чемпионати вакили “Брага”га ўтиши бекор бўлди. Бу ҳақда футболчининг ўзи QALAMPIR.UZ’га маълум қилди.

Telegram’даги “Penalty” каналининг ёзишича, “Брага” футболчига тиббий кўрикдан ўтиш учун хат юборган. Аммо бу вақтда Норчаев Доҳада бўлиб ўтаётган Ўзбекистон миллий терма жамоаси йиғинида эди. Португалияда қишки трансферлар ойнаси 3 февраль куни ёпилиши сабаб, футболчи йиғинни охирига етказмай Тошкентга қайтиб келди.

Ўзбекистонда Португалия элчихонаси ва ваколатхонаси йўқлиги боис, футболчининг агентлари Тошкентдаги Франция элчихонаси орқали Россиядаги Португалия элчихонасига алоқага чиққан. Ўзбекистон Ташқи ишлар вазирлиги ҳам бу вазиятга қўшилган. Аммо Португалия элчихонаси ходимлари қисқа муддатда виза тайёрлаб бера олмаслиги, футболчи душанба куни Москвага учиб кетиши сўралган. Норчаев эса душанба куни, яъни 3 февраль куни Москвада эмас, Португалияда бўлиши керак. Шу сабабли, мазкур трансфер амалга ошмайдиган бўлди.

Эслатиб ўтамиз, аввалроқ, Сардор Рашидов Норчаевнинг Португалия клубига ўтиши ҳақида гапирганди.