Неймар Пеле ва Мессига тегишли рекордни такрорлади

Футбол бўйича Бразилия терма жамоаси Тунисга қарши ўртоқлик учрашувида майдонга тушиб, йирик 5:1 ҳисобида ғалаба қозонди.

Франциянинг “Пари Сен-Жермен” клуби ҳужумчиси Неймар Жуниор Тунис термаси билан ўйиннинг 29-дақиқасида белгиланган пенальтини голга айлантирди. Бу Неймар учун терма жамоа сафидаги 75-гол бўлди. Афсонавий Пеле Бразилия термаси учун гол уриш борасида рекордчи ҳисобланади. Пеле “селесао” учун мумий ҳисобда 77 та гол урган. Неймарга афсонанинг рекордини такрорлаш учун 2 гол керак, холос. 30 ёшли футболчининг ўзи ҳам Пеленинг рекордини янгилаш иштиёқида эканлигини айтган.

Умуман олганда, фақатгина уч нафар футболчи Лотин Америкаси терма жамоаларида 75+ гол урган. Булар: Пеле (77), Месси (90) ва Неймар (75) ҳисобланади.

Маълумот учун, жорий мавсумда Неймар ПСЖ сафида 11 та учрашувда майдонга тушиб, 11  та гол урди ва 8 та голли узатма амалга оширди. ПСЖ эса Франция чемпионатида 22 очко тўплаган ҳолда етакчилик қилмоқда. "Transfermarkt” портали бразилиялик футболчини 75 миллион еврога баҳоламоқда.