Неймар фаолиятини якунлаши мумкин

Бразилиялик ҳужумчи Неймар 2026 йилги Жаҳон чемпионатидан сўнг профессионал футболдаги фаолиятини якунлаши мумкин. Бу ҳақда AS нашри хабар берди.

Манбага кўра, Бразилия терма жамоасининг мундиалдан чиқиб кетиши Неймарнинг келажагига оид режаларини ўзгартирган. Футболчи 2026 йилги Жаҳон чемпионати унинг фаолиятидаги сўнгги мундиал бўлганини тасдиқлаган ва яқин кунларда келажаги борасида якуний қарор қабул қилади.

Айни пайтда 34 ёшли ҳужумчининг “Сантос” билан шартномаси жорий йил охиригача амал қилади. Хабар қилинишича, у ҳозирда қисқа таътилда бўлиб, шундан сўнг клуб ихтиёрига қайтиши кутилмоқда.

Манбанинг таъкидлашича, Неймар ҳозирда учта вариантни кўриб чиқмоқда: “Сантос” билан ҳамкорликни давом эттириш, бошқа клубга ўтиш ёки профессионал фаолиятини якунлаш. Унга яқин манбалар футболчининг бутсаларини михга илиши эҳтимолини ҳам истисно қилмаётгани айтмоқда.

Эслатиб ўтамиз, Неймар 2026 йилги Жаҳон чемпионатида ўз фаолиятидаги тўртинчи мундиалда иштирок этди. У турнирда икки учрашувда майдонга тушиб, битта гол урди. Бразилия 1/8 финалда Норвегияга мағлуб бўлиб, мусобақани тарк этганидан сўнг Неймар миллий терма жамоадаги фаолиятини якунлаганини маълум қилди.