Netflix дунё бўйлаб пароль алмашишга чек қўймоқчи

Стриминг гиганти Netflix миллионлаб обуначилари бор мамлакатларда пароль алмашишни тўхтатмоқчи. Бу ҳақда BBC хабар берди. 

Netflix пандемиядан буён даромадларини ошириш мақсадида бутун дунё бўйлаб пароль алмашишга қарши курашмоқда. Компаниянинг талабларига кўра, битта аккаунтдан фақат бир уйда яшовчи одамлар фойдаланиши керак. Аммо кўплаб давлатларда қоидалар бузилган. 

Май ойида стриминг платформаси бир қанча мамлакатларда, жумладан АҚШ, Буюк Британия ва Франция каби йирик бозорларда пароль алмашишга чеклов қўйган. Энди компания Ҳиндистонда ҳам янги қоидаларини кучга киритмоқчи. Бунга сабаб Netflix ушбу давлатларда ўзининг “пуллик алмашиш” дастурини жорий қилди ва бундан қўшимча фойда кўрди.

Netflix`нинг таъкидлашича, стандарт обунадан арзонроқ бўлган бундай янги тарифлар мижозларни ўзига жалб қилади. Дастурга кўра, агар фойдаланувчилар ўз уйларидан ташқаридаги одамлар билан паролларни баҳам кўришни истаса, қўшимча ҳақ тўлайди.

Қизиғи шундаки, компания пароль алмашишга чеклов қўйишни бошлаганидан сўнг, унинг обуначилари сони кескин ортган. Хусусан, март ойидан буён 5,9 миллион обуначи патформага қўшилган. Бу июнь ойи ҳисоботига кўра, 238 миллион фойдаланувчини ташкил этади.

Эслатиб ўтамиз, Голливуднинг кўплаб киностудиялари қатори Netflix ҳам актёрларга кўпроқ ҳақ тўлаш ва суратга олиш жараёнларида сунъий интеллектдан фойдаланиш масалалари бўйича Америкалик актёрлар уюшмасининг сўровини рад этганди.

Севара Ҳусниддинова