Нетаньяху яна АҚШга боради

Исроил Бош вазири Биньямин Нетаньяху импорт тарифларини олиб ташлаш бўйича музокаралар олиб бориш учун Оқ уйда АҚШ Президенти Дональд Трамп билан шахсан учрашишни режалаштирмоқда. Бу ҳақда Американинг “Axios” ахборот портали бугун, 5 апрель куни вазиятдан хабардор тўртта манбага таяниб хабар берди.

Нашр маълумотларига кўра, Нетаньяхунинг Вашингтонга ташрифи 7 апрель куни бўлиб ўтиши мумкин.

АҚШ Исроил импортига қўядиган божлардан ташқари, етакчилар Ғазодаги вазият ва АҚШ-Эрон ядровий келишувини муҳокама қилиши кутилмоқда.

Исроил Бош вазири тез орада АҚШга боришини бир кун аввал Дональд Трампнинг ўзи ҳам тасдиқлаган эди.

Кеча, 4 апрель куни у президентнинг Air Force One самолёти бортида журналистларга Халқаро жиноий суд уни ҳибсга олишга ордер берганига қарамай, ўша пайтда Будапештга ташриф буюрган Нетаньяху ва Венгрия Бош вазири Виктор Орбан билан телефон орқали гаплашганини айтди. Лидерлар Венгриянинг ХЖCдан чиқишини муҳокама қилдилар ва тарифлар масаласига тўхталдилар.

Шундан сўнг Трамп Нетаньяхуни бу масалани шахсан муҳокама қилишга таклиф қилди, бироқ аниқ санани белгиламади.

Эслатиб ўтамиз, Исроил Бош вазири Биньямин Нетаньяху олдинги сафар 4 февраль куни Оқ уйга бориб, АҚШ Президенти Дональд Трамп иккинчи муддатида қабул қилган биринчи хорижий етакчи бўлганди.