Назарбоевнинг номи темирйўл вокзалидан ҳам ўчириляпти

Қозоғистон пойтахтидаги иккита темирйўл вокзаллари аввалги номига қайтади. Эски вокзалда жойлашган “Нур-Султон” бекати “Остона” деб номланади, “Нур-Султон Нурли йўл” йўналиши мос равишда “Нурли йўл”га айланади. Бу ҳақда “Astana TV” хабар берди.

Тегишли қарор лойиҳаси Очиқ ҳуқуқий ҳужжатлар веб-сайтида эълон қилинган. Ҳужжатга кўра, бошқа бир қатор станциялар ҳам янги номларга эга бўлади.

Масалан, Ғарбий Қозоғистон вилоятининг маъмурий маркази Уральск шаҳрига поездлар янги номланган Орал станциясига боради (ҳозиргидек Уральск эмас). Мангистау вилоятида эса “Ўзен” ўрнига “Жанаўзен” бекати пайдо бўлади.

Ҳужжатнинг жамоатчилик муҳокамаси 22 январга қадар давом этади.

Ҳукумат ҳузуридаги Республика ономастика комиссияси мазкур станциялар номини ўзгартириш бўйича ўтган йилнинг октябрь ойида ижобий хулоса берган эди.

Нурсултон Назарбоев президентликдан кетганидан сўнг давлат раҳбари ваколатларини ўз зиммасига олган Қосим-Жомарт Тўқаев биринчи президент номини пойтахт номига абадийлаштиришни таклиф қилди. Тегишли фармон 23 март куни имзоланган. Ном ўзгартирилгандан сўнг дарҳол бир гуруҳ фуқаролар ушбу қарорга қарши рухсатсиз норозилик намойишларида қатнашди. 

2022 йил январдаги тартибсизликлардан сўнг шаҳар номини ўзгартириш тўғрисида петиция тузилди, унга 229 мингдан ортиқ имзо тўпланди. Натижада Қозоғистон пойтахти 2022 йилнинг кузида яна Остонага айланади.