Назарбоевнинг қизлари “Реал”нинг ўйинига бормоқчи

Қозоғистоннинг биринчи президенти Нурсултон Назарбоев оиласининг айрим аъзолари жорий йилнинг 30 сентябрь куни Олмаота марказий стадионида бўлиб ўтадиган “Қайрат” – “Реал” ўртасидаги футбол ўйинига ташриф буюради. Бу ҳақда “Ertenmedia” хабар берди.

Қайд этилишича, биринчи президент Нурсултон Назарбоевнинг тўнғич қизи Дариға Назарбоева август ойи охирида Олмаотага келган. Айни пайтда, унинг бошқа қизи Алия Назарбоеванинг айтишича, яқин кунларда уларга Марказий сайлов комиссиясининг собиқ раиси Берик Имашевнинг қизи Аидага уйланган биринчи президентнинг набираси Нурали Алиев ҳам қўшилади. “Қайрат” футбол клуби эгаси Қайрат Боранбаев бўлиб, унинг қизи Назарбоевнинг набирасига турмушга чиққан. Қайрат Боранбаев мунтазам равишда Қозоғистоннинг энг бой бизнесменлари қаторида туради. “Forbes” маълумотларига кўра, 2021 йил ҳолатига кўра, унинг бойлиги 590 миллион долларга баҳоланган.

2023 йилнинг мартида Остона суди Боранбаевни “KazTransGaz”га тегишли 14,5 миллиард тенгени ўзлаштириш ва ювишда айблаб, саккиз йилга озодликдан маҳрум қилган эди. Кейинроқ апелляция суди унинг жазо муддатини икки йилга қисқартирди. Айни пайтда Дариға Назарбоеванинг собиқ қайнотаси ўша йилнинг ноябрь ойида қамоқдан озод қилинган эди. Суд Қайрат Боранбаев “давлатга етказган зарарни тўлиқ қоплагани, тергов билан фаол ҳамкорлик қилгани ва қилмишидан пушаймон бўлгани”ни инобатга олган.

Нашрнинг қайд этишича, Назарбоевлар оиласининг мамлакатга бўлган қарашлари Президент Қосим-Жомарт Тўқаевнинг сўнгги мурожаатида Активларни қайтариш бўйича қўмита номини Сармоядорларни ҳимоя қилиш қўмитаси деб ўзгартириш ва футбол клубларини хусусийлаштириш кераклиги ҳақидаги фикрларга мос келади. Мажлис депутати Нортой Сарсенгалиевга кўра, 2025 йилда Қозоғистон футбол клубларини молиялаштириш учун 31,8 миллиард тенге сарфланган.

Тўқаев 8 сентябрь куни халққа йиллик мурожаатида футбол клубларини хусусийлаштиришни тезлаштиришни буюрганди. Унинг қайд этишича, Қозоғистоннинг тўртта клуби аллақачон таниқли тадбиркорлар тимсолида ўз эгаларини топган.

Қозоғистоннинг “Қайрат” футбол клуби UEFA Чемпионлар лигасининг умумий босқичидаги ўз майдонидаги ўйинларга чипта сотиш тартиби, нархи ва муддатларини эълон қилганди. 

Хусусан, “Қайрат” – “Реал Мадрид” учрашувига чипталар жорий йилнинг 23 сентябрь куни соат 17:00 да сотувга чиқади. Унинг нархи 30 минг тенгедан (тахминан 690 минг сўм) бошланади. Энг қиммат чипаталар эса 250 минг тенге (тахминан 5 млн 730 минг сўм). Бир кишига 2 тадан ортиқ чипта сотилмайди. Шунингдек, чипта харид қилишда паспорт маълумотлари текширилади.

Маълумот учун, “Қайрат”нинг “Реал Мадрид”га қарши ўйини жорий йилнинг 30 сентябрь куни бўлиб ўтади. Баҳс Олмаота шаҳридаги “Марказий” стадионида ўтказилади.