Нато Бош котиби Россия сувости кемасининг устидан кулди

НАТО Бош котиби Марк Рютте жорий йилнинг 13 октябрь куни Франция қирғоқлари яқинида сув юзасига чиққан Россиянинг сувости кемасининг устидан кулди. Бу ҳақда “Euronews” хабар берди.

Маълумотларга кўра, Россиянинг “Новороссийск”сувости кемаси Франция қирғоқлари яқинида сувга чиққан ва Шимолий денгизда Нидерландия ҳарбий-денгиз кучлари томонидан кузатиб борилган. Марк Рютте Россиянинг кемаларини ишламай қолганини айтиб, устидан кулган.

“Энди, моҳиятан, Ўртаер денгизида деярли Россия ҳарбий-денгиз кучларининг иштироки қолмади. Фақат ёлғиз, бузилиб қолган Россия сувости кемаси патрулликдан сўнг оқсоқланиб уйга қайтмоқда”, деган Марк Рютте Словениядаги чиқишида.

Россия Ҳарбий-денгиз кучлари матбуот хизмати Қора денгиз флоти сувости кемасидаги носозликлар ҳақидаги хабарларни рад этиб, у Ла-Манш бўйида навигация қоидаларига риоя қилгани ва яроқли эканини таъкидлаган.

“Баъзи оммавий ахборот воситалари томонидан чиқарилган Франция қирғоқлари яқинида “Новороссийск” дизель-электр сувости кемасининг ишламаслиги ва бунинг натижасида фавқулодда вазият юзага келганлиги ҳақидаги маълумотлар ҳақиқатга тўғри келмайди. Аслида, Б-261 экипажи ҳозирда Россия Ҳарбий-денгиз кучлари қўшинларидаги доимий топшириқларни бажаргандан сўнг режалаштирилган флотлараро саёҳатни амалга оширмоқда”, дея қўшимча қилинади хабарда.

Шунингдек, НАТО Бош котиби Марк Рютте вазиятни кулгили эканлигига шама қилиб, уни америкалик ёзувчи Том Кленсининг 1984 йилда чоп этилган “Қизил октябрга ов” романидаги ҳолатга ўхшатган.

Эслатиб ўтамиз, аввалроқ Россиянинг собиқ президенти ва айни пайтдаги Россия Хавфсизлик кенгаши раиси ўринбосари Дмитрий Медведев Украина қандай вазиятга тушиб қолганини мем билан тасвирлаб устидан кулган эди.

Бунёд Келдибоев