Наманганда ошхона эгасидан пул талаб қилган шахс ушланди

Наманган вилоятининг Норин туманида ошхона фаолиятига аралашиб, тадбиркордан пул талаб қилган шахс ушланди. Бу ҳақда вилоят Ички ишлар бошқармаси хабар берди.

Қайд этилишича, 1989 йилда туғилган, аввал судланган шахс Норин туманидаги “Роҳат” номли ошхона фаолиятига мунтазам равишда аралашиб келган. У турли идораларга шикоят қилиш ҳамда ошхона омборхонасида олинган видеоларни ижтимоий тармоқларда тарқатиш билан таҳдид қилган.

Маълум бўлишича, у қурилиш ишлари учун ғишт сотиб олиш баҳонасида ошхона эгасидан 1,8 миллион сўм талаб қилган. Шундан 1 миллион сўми пластик карта орқали ўтказиб берилган.

Шундан сўнг ҳам товламачилик ҳаракатларини давом эттириб, берилган аризани қайтариб олиш, ошхона фаолиятига бошқа аралашмаслик ва видеоларни ўчириб ташлаш эвазига 300 АҚШ доллари талаб қилган.

Тезкор тадбир давомида у “Роҳат” ошхонаси олдида кимёвий ишлов берилган 300 АҚШ долларини олаётган вақтида ашёвий далиллар билан ушланган.

Ҳолат юзасидан Норин тумани ИИБ ҳузуридаги Тергов бўлинмаси томонидан Жиноят кодексининг 165-моддаси (товламачилик) 2-қисми “а” банди билан жиноят иши қўзғатилган. Гумонланувчи процессуал тартибда ушланган.

Эслатиб ўтамиз, аввалроқ Фарғона шаҳрида фуқародан сир сақланиши лозим бўлган маълумотларни ошкор қилиш билан таҳдид қилиб, пул талаб қилган аёл қўлга олингани ҳақида хабар берилганди.