“Ньюкасл” Зиданга таклиф юборди. Зизунинг парвойи фалак

“Ньюкасл” раҳбарияти жамоанинг янги бош мураббийлигига номзод мутахассислар рўйхатини тузди. Унда “Реал Мадрид” собиқ бош мураббийи Зинедин Зидан номи ҳам келтирилган. Бу ҳақда “Marca” нашри хабар тарқатди.

“Оқ-қоралар” раҳбарияти франциялик мутахассисни таклиф қилиш вариантини жиддий кўриб чиқмоқда. Бироқ, Зиданнинг ўзи “Ньюкасл” билан шартнома имзолашни хоҳламаяпти. У Франция терма жамоасини бошқармоқчи ва ҳозирча ҳеч бир клуб билан музокара ўтказиш нияти йўқлигини маълум қилган.

Эслатиб ўтамиз, жорий йилнинг 7 октябрь куни Саудия Арабистони валиаҳд шаҳзодаси Муҳаммад бин Салмон бошқарувидаги жамғарма “Ньюкасл” клубини сотиб олганини маълум қилгандик.

Маълумот учун, Зидан илк бор мураббийлик фаолиятини 2015-2016 йилги мавсумда “Реал”га устозлик қилишдан бошлаган. Зизу жамоа билан кетма-кет уч марта UEFA Чемпионлар лигаси, Европа суперкубоги (2), Испания чемпионати (2), Суперкубоги ва клублар ўртасидаги Жаҳон чемпионатида зафар қучган.