Нью-Йоркда жинсий жиноятларда гумонланган ўзбекистонлик ҳибсга олинди

АҚШнинг Нью-Йорк шаҳрида яшаб келган 21 ёшли Ўзбекистон фуқароси У.Д. га федерал агентлар томонидан бир нечта оғир жинсий жиноятлар бўйича айбловлар қўйилиб, ҳибсга олинди. Бу ҳақда АҚШ Иммиграция ва божхона назорати хизмати (ICE) хабар берди.

Нашрга кўра, У.Д. га қўйилган айбловлар орасида зўрлаш (розиликсиз жинсий алоқада бўлиш), жинсий зўравонлик, тан жароҳати етказиш мақсадида тажовуз қилишга уриниш, шунингдек, жабрланувчи розилигисиз содир этилган бошқа жинсий тажовуз шакллари мавжуд.

“ICE жамоатчилик хавфсизлигига таҳдид солувчи жиноятчи муҳожирларни ҳибсга олиш ва депортация қилишга устувор аҳамият беради, айниқса Нью-Йоркда оғир жиноятлар содир этганлар устидан. Яхшиямки, FBI ҳамкорлигида биз У.Д. ни маҳаллий идоралардан озод қилинганидан сўнг тезда ҳибсга ола олдик”, дея баёнот берди ICE’нинг Нью-Йоркдаги Бошқарув офиси раҳбари Уильям Жойс.

У.Д. ни АҚШ Чегара патрули 2022 йил 28 декабрь куни Аризонадаги Лукевилле яқинида АҚШга Мексика орқали ноқонуний кирганида қўлга олган. У депортация жараёнига қўйилган ва 2023 йил 28 июлда иммиграция суди уни АҚШдан чиқариб юбориш тўғрисида қарор чиқарган.

2024 йил 19 февраль куни ICE’нинг Нью-Йоркдаги офиси У.Д. ни жиноят содир этган ноқонуний муҳожир сифатида қайд этиб, уни ушлаб туриш учун суд органларига илтимоснома юборган. Аммо эртаси куни Квинсдаги марказий ҳибсхона бу илтимосномани инобатга олмасдан, уни озод қилган.

ICE ва АҚШ Ички хавфсизлик бўйича тергов идораси (HSI) агентлари У.Д. ни Статен-Айлендда махсус рейд давомида ҳибсга олиб, уни ICE’нинг офисига жўнатган. У ҳозирча ICE қамоқхонасида сақланмоқда.

Эслатиб ўтамиз, аввалроқ болаларни жинсий эксплуатация қилиш мақсадида сотиш айблови бўйича судланган Ўзбекистон фуқароси АҚШдан депортация қилинганди.