Нью-Йорк полицияси яна бир Президентни тик оёқда кутишга мажбур қилди (видео)

Нью-Йорк шаҳрида полиция Америка раҳбари Дональд Трампнинг кортежи ўтиши учун Туркия Президенти Ражаб Тойиб Эрдўғаннинг кортежини тўхтатди. Бу ҳақда “Daily Mail” хабар берди.  

БМТ Бош Ассамблеясининг 80-сессияси арафасида дипломатик кортежлар иштирокида навбатдаги қизиқ воқеа Эрдўған билан юз берди.  Франция раҳбари АҚШ Президенти кортежига йўл очилиши учун Нью-Йорк кўчаларида тўхтатилганидан бир кун ўтар-ўтмас Эрдўған ҳам Трамп томонидан “камситилган” яна бир дунё етакчисига айланди.

Ижтимоий тармоқларда тарқалган видеода Туркия етакчисининг кўчада кутиб тургани ва қўриқчилари эса уни қуршаб олганини кўриш мумкин. Эрдўғаннинг муносабати франциялик мавқедоши каби хотиржамдек кўринмаган. Шундай бўлса-да, у Макрондан фарқли ўлароқ, Оқ уй раҳбарига телефон қилиб, “таниш-билиш” қилиб юрмаган. Макрон эса машинадан тушиб, Трампга сим қоққанди.

2025 йилнинг 9 сентябрь куни БМТ Бош Ассамблеясининг 80-сессияси ўз ишини бошлади. Анъанага мувофиқ, сессия доирасида юқори даражадаги ҳафта ташкил этилмоқда. Умумий сиёсий мунозаралар 23–29 сентябрь кунлари бўлиб ўтиши режалаштирилган.

Эслатиб ўтамиз, Туркия Президенти Ражаб Тойиб Эрдўған БМТ доирасида ўтказилган “Фаластин масаласига ечим топиш ва икки давлатли ечимни амалга ошириш” мавзусидаги халқаро конференциядаги чиқишида Ғазодаги ҳаракатлари учун Исроилни қоралай бошлаган пайтда унинг микрофони ўчирилганди. У ўз нутқида Фаластин давлати тинчликка эришиб, тўлақонли мустақил бўлмагунча, Туркия курашишда давом этишини айтди. “Fox News” телеканалига берган интервьюсида эса Украинадаги уруш тез орада тугашига ишонмаслигини таъкидлади. Шу билан бирга, у Анқара Россия ва Украина ўртасидаги музокараларда воситачилик ролидан воз кечмаслигини маълум қилган.