МЮ футболчилари Почеттинонинг тайинланишидан норози – ОАВ

“Манчестер Юнайтед”нинг бир қатор футболчилари Маурисио Почеттинонинг бош мураббий этиб тайинланишидан норози бўлмоқда. Бу ҳақда “talkSPORT” нашри хабар берди.

Нашрга кўра, футболчилар Унаи Эмерининг Майкл Кэррик ўрнини эгаллашига умид қилишган. Айрим футболчилар испаниялик мутахассисни Почеттинодан кучлироқ мураббий деб ҳисоблашади ва унинг жамоани бошқаришини исташган.

Фабрицио Романонинг маълум қилишича, “Манчестер Юнайтед” Маурисио Почеттино билан асосий шартлари бўйича оғзаки келишувга эришган. “Қизил иблислар” АҚШ термага Почеттинонинг 10 миллион долларлик товон пулини тўлаш имкониятидан фойдаланишни режалаштирмоқда.

Манбага кўра, “Манчестер Юнайтед” раҳбарияти Эмерини “Астон Вилла”дан кетишга кўндириши қийин бўлган.

Маълумот учун, 45 ёшли Кэррик жорий йилнинг январь ойида “Манчестер Юнайтед” бош мураббийи этиб тайинланган. Унга қадар икки марта жамоада вақтинчалик бош мураббий вазифасини бажарган: 2018 йилда Жозе Моуриньо кетганидан кейин ва 2021 йилда мураббийлар штабида фаолият юритган Оле-Гуннар Сульшер истеъфога чиқарилганидан сўнг.

2022 йилдан 2025 йилгача Кэррик “Мидлсбро” бош мураббийи бўлиб ишлаган. У футболчилик фаолияти давомида “Манчестер Юнайтед” билан беш марта Англия чемпионлигини, Чемпионлар лигаси, Европа лигаси ва клублар ўртасидаги Жаҳон чемпионатини қўлга киритган. Жорий йилнинг май ойида “Манчестер Юнайтед” Кэррик билан шартномани 2028 йилгача узайтирган эди.

Эслатиб ўтамиз, аввалроқ “Манчестер Юнайтед” Майкл Кэррикни истеъфога чиқарганди.