Мухлислар ЖЧга боришда муаммоларга дуч келиши мумкин

Буюк Британия ва Европадан борадиган футбол мухлислари 2026 йилги Жаҳон чемпионатида АҚШга киришда муаммоларга дуч келиши мумкин. “Global Work & Travel” компанияси вакили Жесси Чамберснинг айтишича, эски твитлар, майда жиноят ёзувлари ёки нотўғри тўлдирилган ESTA (саёҳатга рухсатнома) аризалари саёҳатчиларнинг киришини рад этишга олиб келиши мумкин. Бу ҳақда “Тhе Sun” нашри хабар берди.

2026 йилдан бошлаб АҚШ чегара агентлари визага ариза берганларининг ижтимоий тармоқлардаги фаолиятини текшириши мумкин. Чамберснинг огоҳлантиришича, ҳақоратли постлар, сиёсий контент ёки хавфсизлик ва гиёҳванд моддалар билан боғлиқ ҳазиллар “қизил байроқ” ҳисобланади. Ҳатто кичик қоидабузарликлар, масалан, ҳайдаш тақиқлари ҳам виза билан боғлиқ муаммоларни келтириб чиқариши мумкин.

“Мухлисларга визага тайёргарликни худди ўйинга тайёргарликдек жиддий қабул қилиш тавсия этилади. Қанчалик эрта бошланса, муаммоларга дуч келиш эҳтимоли шунчалик кам бўлади. Кўпчилик ESTA рухсатномасини кафолат деб ўйлайди, бироқ ҳатто битта нотўғри белгиланган жавоб ҳам кириш рад этилишига сабаб бўлиши мумкин. Агар саёҳатчи илгари ҳибсга олинган ёки айбланган бўлса, B-1/B-2 визаларига эрта мурожаат қилиш тавсия этилади”, дейди “Global Work & Travel” компанияси вакили Жесси Чамберс.

 Маълумот учун, Трамп маъмурияти чегара ходимларига саёҳатчиларни сўроқ қилиш ва рад этиш ваколатини кенгайтирди. FIFA эса яқинда эълон қилган баёнотида жаҳон чемпионати мезбонлик қиладиган шаҳарлар бўйича сўнгги сўз АҚШ ҳукумати вакилларига тегишли эканлигини тан олди. 11 мезбон шаҳар миллионлаб халқаро меҳмонларни кутмоқда.

Эслатиб ўтамиз, аввалроқ 2026 йил АҚШ, Канада ва Мексикада ўтказиладиган футбол бўйича Жаҳон чемпионати ўйинларига бир миллиондан ортиқ чипта сотилган эди.