“Муаммо мураббийда эмас”. Мартинес МЮдаги муаммолар ҳақида очиқ гапирди

“Манчестер Юнайтед” ҳимоячиси Лисандро Мартинес “Атлетико Мадрид”дан учралган мағлубиятдан кейин клубдаги муаммолар ҳақида фикр билдирди. Аргентиналик футболчи жамоа раҳбариятидан таркибни кучайтириш ва рақобатбардош жамоа тузиш учун кўпроқ ҳаракат қилишни кутмоқда. Бу ҳақида у “Атлетико” га қарши ўйиндан кейин журналистларга берган интервьюсида сўз очди.

“Жуда ёмон, шунчаки даҳшатли. Ўзимни тийишимга тўғри келяпти, аммо баъзан бу ҳолатларнинг барчаси клуб ҳозир қандай аҳволда эканини аниқ акс эттиради. Ўтган мавсумда биз ажойиб ўйнадик. Энди эса клуб раҳбариятидан кўпроқ нарса кутяпмиз. Рақобатлаша олишимиз учун кўпроқ футболчилар керак, чунки бошқа жамоалар ҳам кўплаб янги ўйинчиларни таркибига қўшмоқда”, дейди Мартинес.

Шунингдек, Аргентина терма жамоаси ҳимоячиси клуб раҳбариятидан катта сармоялар киритиш кутаётганини ва ҳозирги таркиби рақобатлашиш учун етарли емаслигини айтди.

“Мен катта сармоялар киритилишини кутяпман – бу аниқ! Техник директоримиздан ҳам кўпроқ иш талаб қиламан. Ростини айтсам, биз футболчилар ҳам яхшироқ ҳаракат қилишимиз керак. Бироқ бундай муҳим учрашувларда рақобатлаша олиш учун кучли таркибга ҳам эга бўлиш зарур”, дейди у.

Мартинес муаммо мураббийда эмаслигини ва уни доимий равишда алмаштиравериш тўғри ечим эмаслигини ҳам айтган.

“Менимча, муаммо мураббийда эмас. У қўлидан келган барча ишни қиляпти. Мураббийни доимий равишда алмаштиравериш мумкин эмас. Бошқа соҳалардаги муаммолар-чи? Бу ҳақда бошқа гапира олмайман”, дейди Мартинес.

Аргентиналик ҳимоячининг фикрича, жамоа натижаларини яхшилаш учун нафақат футболчиларнинг ўйинини кучайтириш, балки клуб раҳбарияти томонидан ҳам жиддий қадамлар ташланиши керак.

Маълумот учун, жорий мавсум бошлангандан бери “Манчестер Юнайтед” 9 та учрашувда майдонга тушган бўлса, жамоа шуларнинг фақат 2 тасида ғалаба қозонолди холос.