Москва Киевни ракета “ёмғири” остида қолдирди. Қурбонлар бор

Россия ҳарбийлари бугун, 14 ноябрга ўтар кечаси Киевга ракета ва учувчисиз аппаратлар орқали ҳужум уюштирди. Бу ҳақда Киев ҳарбий маъмурияти раҳбари Темур Каченко маълум қилди.

Украина Фавқулодда вазиятлар вазирлиги хабарига кўра, ҳужум оқибатида Киевнинг бир нечта туманларида кўп қаватли уйлар ёниб кетган. Сўнгги маълумотларга кўра, бир киши ҳалок бўлган, 24 киши жароҳатланган, 40 киши қутқарилган. Киев мэри Виталий Кличко эса 25 киши жароҳатлангани ҳақида айтган. Жароҳатланганлардан тўққиз нафари шифохонага ётқизилган, қолганларига эса воқеа жойида ёрдам кўрсатилган.

Қутқарувчиларнинг маълумотига кўра, Деснянский туманида жойлашган кўп қаватли уйларнинг 3-қаватида чиққан ёнғин оқибатида бир киши ҳалок бўлган. Шу тумандаги бошқа манзилда ҳам еттинчи қаватда ёнғин юз берган.

Подольск, Днепровск, Соломянский, Святошинский ва Оболонь туманларидаги тураржой биноларида ҳам ёнғинлар қайд этилган.

Голосийивский туманида ракета ёки дрон бўлаклари шифохона ҳудудига тушган. Днепровск туманида спорт базасидаги ёғоч иншоотлар 200 квадрат метр майдонда ёниб кетган. Дарницкий туманида эса мактаб ҳудудида ёнғин чиққан.

Эслатиб ўтамиз, аввалроқ Россия ва Украина ўртасида шу йил давомида бўлиб ўтган тинчлик музокаралари натижа йўқлиги сабабли тўхтатилганди.