ММА турниридан сўнг 18 ёшли йигит комага тушди

Қарағандада 18 ёшли спортчи аралаш жанг санъати (ММА) турнирида бошидан оғир жароҳат олиб, комага тушди. Бу ҳақда “NUR.KZ” хабар берди.

Спортчи синглисининг сўзларига кўра, 2026 йил 14–15 февраль кунлари Қарағандада аралаш жанг санъати турнири бўлиб ўтган.

Биринчи куни унинг акаси Арслан иккита жанг ўтказиб, ғалаба қозонган. Иккинчи куни, синглисининг айтишича, жанг пайтида рақиби ноқонуний ҳаракат қилиб, Арсланнинг бошига зарба бериб юборган.

Шундан сўнг, спортчи бошини чангаллаганча, йўлини йўқотган ҳолда оёққа туришга қийналди. Аммо жанг давом эттирилган. Иккинчи раунддан сўнг Арслан ҳушини йўқотиб йиқилган ва хириллашни бошлаган. У рингда комага тушди. Ҳодиса видеога олинган ва синглиси уни ижтимоий тармоққа жойлаштирган.

Шифохонага ётқизилган спортчига травмадан кейинги мия қон кетиши, миянинг оғир контузияси, чап ярим шарнинг ўткир субдурал гематомаси, мия шиши ва 2–3 даражали кома ташхиси қўйилган. Унга шошилинч жарроҳлик амалиёти ўтказилган. Ҳозирча унинг аҳволи оғирлигича қолмоқда. 

Қарағанда вилояти полиция бошқармаси ушбу ҳодиса бўйича Қозоғистон Республикаси Жиноят кодексининг 114-моддаси (Эҳтиётсизлик оқибатида тан жароҳати етказиш) бўйича судгача тергов бошлаган.