Мирзиёев Тўқаевни табриклади

Ўзбекистон Президенти Шавкат Мирзиёев бугун, 17 май куни бўлиб ўтган телефон орқали мулоқотда Қозоғистон Президенти Қосим-Жомарт Тўқаевни таваллуд куни билан самимий табриклаб, қардош Қозоғистон халқининг фаровонлиги ва равнақи йўлидаги масъулиятли давлатчилик фаолиятида катта муваффақиятлар тилади. Бу ҳақда Президент матбуот хизмати хабар берди.

Суҳбат давомида Ўзбекистон билан Қозоғистон ўртасидаги яхши қўшничилик, стратегик шериклик ва иттифоқчилик муносабатларини янада ривожлантириш ва мустаҳкамлашнинг долзарб масалалари муҳокама қилинган.

Бўлажак икки томонлама учрашувлар ва кўп томонлама тадбирлар режаси кўриб чиқилган.

Савдо, саноат кооперацияси, самарали логистика, қишлоқ хўжалиги, туризм, таълим, маданий алмашинув каби устувор йўналишларни қамраб олган икки томонлама амалий ҳамкорликнинг янги кун тартибини шакллантириш борасидаги ишларни давом эттиришга алоҳида эътибор қаратилган.

Маълумот учун, Президент Қосим-Жомарт Тўқаев 1953 йил 17 майда Олмата шаҳрида туғилган. Унинг отаси Кемел Тўқаев Иккинчи Жаҳон урушининг қатнашчиси ва таниқли ёзувчи, онаси эса Турар Шабарбаева — Олмаота педагогика институтининг тилшунослик факультетида ишлаган.

Қосим-Жомарт Тўқаев Қозоғистон Республикаси Президенти лавозимига илк бор 2019 йил 20 март куни, Нурсултон Назарбоев истеъфосидан сўнг, вақтинчалик президент сифатида, 2019 йил 9 июнь куни ўтказилган сайловда эса расман президент этиб сайланди.

2022 йилнинг 20 ноябрида бўлиб ўтган навбатдан ташқари президентлик сайловида у иккинчи муддатга сайланди. Бу сайловда Қозоғистонда янги конституциявий ўзгаришларга мувофиқ етти йиллик ягона президентлик муддати жорий этилди. Бугун Тўқаев 72 ёшни қаршилади.