Мирзиёев Қувайт валиаҳди билан учрашди

Президент Шавкат Мирзиёев бугун, 18 февраль куни Ал-Кувайт шаҳрига ташриф доирасида ушбу мамлакат валиаҳди Шайх Сабоҳ ас-Сабоҳ билан учрашув ўтказди. Бу ҳақда Президент матбуот хизмати хабар берди.

Учрашувда икки давлат ўртасидаги дўстлик ва кенг қамровли шериклик муносабатларини янада ривожлантириш ҳамда мустаҳкамлаш масалалари кўриб чиқилди. Суҳбат бошида Мирзиёев валиаҳдга самимий қабул ва алоҳида эътибор учун миннатдорлик билдирди.

Куни кеча бўлиб ўтган олий даражадаги музокаралар, ҳукумат аъзолари ва етакчи компаниялар билан сермаҳсул учрашувлар кўп қиррали Ўзбекистон-Кувайт муносабатларини кенгайтириш учун мустаҳкам асос бўлиши таъкидланди.

Олий ва юқори даражада яқин мулоқот ва алмашинувларни давом эттиришга келишиб олинди. Инвестицияларни жалб қилиш учун платформани тез фурсатда ишга тушириш, агросаноат мажмуи, транспорт ва логистика, соғлиқни сақлаш, таълим, фармацевтика, инфратузилма ва бошқа йўналишларда кооперация лойиҳаларини амалга оширишга келишиб олинди.

“Марказий Осиё - Кўрфаз араб давлатлари ҳамкорлик кенгаши” мулоқоти доирасидаги ташаббусларни ўзаро қўллаб-қувватлаш масалаларига алоҳида эътибор қаратилди.

Эслатиб ўтамиз, Ўзбекистон раҳбари Қувайт Давлати Амири Шайх Мишъал ас-Сабоҳнинг таклифига биноан 17 февраль куни расмий ташриф билан ушбу мамлакатга етиб борди. Мирзиёев ҳамда Шайх Мишъал ас-Сабоҳ Ал-Қувайт шаҳридаги “Ал-Баян” саройида тор доирада учрашув ҳамда расмий делегациялар аъзолари иштирокида музокара ўтказди. Музокаралар якунлангач, Президент Шавкат Мирзиёев шарафига Қувайтдаги дипломатик миссиялар раҳбарлари иштирокида тантанали қабул маросими уюштирилди. Шунингдек, Мирзиёев Қувайтга ташрифи доирасида ўзи учун ажратилган қароргоҳда ушбу мамлакат Бош вазири вазифасини бажарувчи, Ички ишлар вазири Шайх Фаҳд ас-Сабоҳ бошчилигидаги делегацияни қабул қилди.