Мирзиёев Будапештда Венгрия парламенти спикери билан учрашди

north_east

Ўзбекистонда Венгрия банки билан паррандачилик кластери ташкил этилади

Президент Шавкат Мирзиёев бугун, 20 май куни Венгриянинг Будапешт шаҳрида ушбу мамлакат Миллий Мажлиси спикери Ласло Кёвер билан учрашув ўтказди. Бу ҳақда Ўзбекистон Президенти матбуот хизмати хабар берди.

Учрашувда Ўзбекистон-Венгрия стратегик шериклик муносабатларини, шу жумладан парламентлараро йўналишни янада ривожлантириш масалалари кўриб чиқилди.

Икки мамлакат парламентлари делегацияларининг ўзаро ташрифлари ва учрашувлари фаоллашгани мамнуният билан қайд этилди. Жорий йилнинг апрель ойида Тошкент шаҳрида бўлиб ўтган Парламентлараро иттифоқнинг 150-юбилей ассамблеясида Миллий Мажлис спикерининг ўринбосари Янош Латорцаи иштирок этди.

Президент матбуот хизматига кўра, йил якунига қадар Венгрия парламенти спикери ўринбосари ва Иқтисодиёт қўмитаси раҳбарининг Ўзбекистонга, Ўзбекистон парламент делегациясининг Будапешт шаҳрига ташрифи амалга оширилади.

Имзоланган битимларни амалга оширишга кўмаклашиш, дўстлик гуруҳлари ишини фаоллаштириш, энг аввало, ҳудудларни ривожлантириш, ижтимоий ҳимоя, солиқ ва рақамлаштириш соҳаларида қонун ижодкорлиги бўйича тажриба алмашиш учун тегишли қўмиталар ўртасида алоқаларни йўлга қўйиш муҳимлигига алоҳида эътибор қаратилди.

Эслатиб ўтамиз, Ўзбекистон Республикаси Президенти Шавкат Мирзиёев Венгрия Бош вазири Виктор Орбаннинг таклифига биноан кеча, 19 май куни расмий ташриф билан ушбу мамлакатга жўнаб кетганди. Давлат раҳбарининг расмий ташрифи бугун, 20 май куни Венгриянинг йирик компания ва банклари раҳбарлари билан учрашишдан бошланди ва унда саноат кооперациясини кенгайтириш ва илғор технологиялар трансферини рағбатлантириш мақсадида Тошкент вилоятида Европа компаниялари учун ташкил этилаётган махсус саноат зонаси ва ушбу ҳудудни бошқариш Венгриянинг Inpark операторига берилиши маълум қилинди.