Миразиз Мирзаҳалилов Тошкентда камар учун жанг қилади 

Ўзбекистонлик профессионал боксчи Миразиз Мирзаҳалилов 16 июнь куни Тошкентда ташкил этиладиган бокс оқшомида камар учун жанг қилади. 

Мирзаҳалиловга ўша куни қозоғистонлик Нурслан Собиров рақиблик қилади. 53 килограмм вазн тоифасида кечадиган баҳс WBA'нинг Осиё минтақавий камари учун бўлиб ўтади. 

Бунга қадар Мирзаҳалилов профессионал боксда 2 та жанг ўтказиб, ҳар иккаласида рақибларини муддатидан олдин таслим этган. Унинг қозоғистонлик рақиби эса 9 та жангининг 7 тасида ғалаба қозонган.

Шунингдек, 63,5 килограмдаги турнир финалида яна бир ўзбекистонлик проф боксчи Мужибилло Турсунов ҳам Қозоғистон вакили Дилшод Нуримга қарши WBC Осиё минтақавий камари учун баҳс олиб боради. 

Бу жанг Мужибилло учун профессионал боксдаги учинчиси ҳисобланади. Унгача у профбоксда 2 та жанг ўтказиб, ғалабага эришган. Рақиби ҳам 6 та жангининг барчасида зафар қучган.

Эслатиб ўтамиз, аввалроқ британиялик собиқ WBO чемпиони британиялик Пол Батлер навбатдаги жангини Тошкентдаги “Ҳумо” аренада ўтказиши ҳақида хабар берилганди. Ҳозирча унинг рақиби аниқ эмас.

Муҳсинжон Умурзоқов