“Миннесота тўйиб кетди”. АҚШда чегара хизмати бир эркакни отиб ўлдирди

Бугун, 24 январь куни АҚШ чегара хизмати ходимлари Миннеаполис шаҳрида бир эркакни отиб ўлдирди. Бу ҳақда “Star Tribune” хабар берди.

Ҳодиса эрталаб Миннеаполиснинг жанубий қисмида содир бўлган. Полиция маълумотига кўра, эркак воқеа жойида вафот этган. АҚШ Ички хавфсизлик департаментининг “Fox News”га маълум қилишича, унинг қўлида тўппонча бўлган.

“Қўшимча тафсилотларни аниқлаяпмиз. Жамоатчиликдан хотиржамликни сақлашни ва ушбу ҳудуддан четлаб ўтишни сўраймиз”, дея баёнот берган шаҳар ҳокимияти.

Миннесота губернатори Тим Уолц Оқ уй билан “яна бир даҳшатли отишма”ни муҳокама қилганини билдирган.

“Миннесота бундай ҳолатлардан тўйиб кетди. Бу жирканч”, деб ёзган у Х’да.

Шунингдек, Уолц АҚШ Президенти Дональд Трампни зудлик билан Миннесота штатидан “минглаб зўравон ва етарли тайёргарликка эга бўлмаган офицерлар”ни олиб чиқишга чақирган.

Эслатиб ўтамиз, жорий йилнинг 7 январь куни АҚШ Миграция ва божхона полицияси (ICE) ходими миннеаполислик 37 ёшли Рени Гудни отиб ўлдирганди. Шундан сўнг бутун мамлакат бўйлаб норозилик намойишлари ўтказилди. 13 январь куни Миннесота расмийлари штатда ICE кучларининг жойлаштирилиши сабабли АҚШ федерал ҳукуматига қарши судга мурожаат қилган.