АҚШда иммиграция ходими аёлни ўлдириши ортидан норозилик акцияси бошланди (видео)

Аввалроқ, АҚШнинг Иммиграция ва божхона назорати хизмати (ICE) ходими Миннесота штатининг Миннеаполис шаҳрида 37 ёшли аёлни отиб ўлдиргани ҳақида хабар берилган эди. Ушбу воқеадан сўнг АҚШнинг бир қатор шаҳарларида норозилик акциялари бошланди. Бу ҳақда “Minnesota Public Radio” хабар берди.

Воқеа кеча, 7 январь куни содир бўлганди. Ҳодисанинг аниқ тафсилотлари ҳозирча номаълум бўлиб қолмоқда ва федерал ҳамда маҳаллий ҳокимиятлар ўртасида кескин баҳсларга сабаб бўлмоқда. Трамп маъмурияти вакилларининг билдиришича, 37 ёшли аёл Рене Гуд “тартибсизликларда фаол иштирок этган, тажовузкор шахс” бўлган. У гўёки автомобиль билан ICE ходимларини босиб кетишга уринган. Шу сабабли агентлардан бири машинага қарата “ўзини ҳимоялаш мақсадида” ўқ узган. Бироқ шаҳар ва минтақавий ҳокимиятлар, шунингдек Демократик партия вакиллари бу версияни инкор этмоқда.

Миннеаполис мэри Жейкоб Фрей ходим “бепарволик билан куч ишлатгани ва бунинг оқибатида инсон ҳалок бўлгани”ни айтди. У ICE ходимлари “шаҳардан чиқиб кетиши керак”лигини айтди.

Маҳаллий нашрларга кўра, отишма Трамп маъмурияти томонидан Миннеаполисда қабул қилинган миграция қонунчилигини кескинлаштиришга қаратилган кенг кўламли чоралар фонида содир бўлган. АҚШ Ички хавфсизлик вазири Кристи Ноэм аёлнинг ҳаракатларини “ички терроризм” деб баҳолаган ва шаҳарда ICE рейдлари давом эттирилишини билдирган.

Бироқ Миннеаполис шаҳар кенгаши ҳалок бўлган аёл “қўшниларига ғамхўрлик қилаётган пайтда ўлдирилган”ини маълум қилган. Миннесота штати губернатори Тим Уолз ҳам федерал ҳокимият баёнотларини рад этган.

“Илтимос, бу тарғибот машинасига ишонманг”, деб ёзди Уолз Ички хавфсизлик вазирлигининг отишма ҳақидаги баёнотига жавобан.

Ҳодиса ортидан Миннеаполисда норозилик намойишлари бошланди. Акцияларда иштирокчилар ҳодисани қоралаб, ICE’ни шаҳарни тарк этишга чақирмоқда. Норозиликлар Миннеаполисдан ташқарида ҳам ўтказилмоқда. Хусусан, Янги Орлеан, Майами, Сиэтл ва Нью-Йорк шаҳарларида ҳам митинглар бўлиши кутилмоқда.

“Fox News” хабарига кўра, Миннесота губернатори Тим Уолз штат Миллий гвардиясини жанговар шай ҳолатга келтирганини билдирган. Унинг айтишича, Миллий гвардияга огоҳлантирувчи буйруқ берилган, бу кескинлик кучайган тақдирда қўшинларни жалб этишга тайёргарлик кўришнинг дастлабки босқичи ҳисобланади.

“Биз ҳеч қачон федерал ҳокимият билан уруш қилмаганмиз. Аммо Миллий гвардияни тайёрлаяпмиз. Зарурат туғилса, у жойлаштирилишга тайёр”, дейди Уолз.

CNN маълумотига кўра, Миннеаполис полиция департаменти ходимлар учун дам олиш кунларини бекор қилган ва эҳтимолий тартибсизликларнинг олдини олиш учун қўшимча ёрдам сўраган.

Эслатиб ўтамиз, ҳодиса юзасидан АҚШ Президенти Дональд Трамп ҳам муносабат билдирганди. У аёлни “профессионал агитатор” деб атаб, унинг “жуда тартибсиз ҳаракат қилгани ва қаршилик кўрсатгани”, сўнг эса “ICE ходимини атайлаб уриб юборгани”ни айтди. Трампнинг билдиришича, ходим унга қарата ўқни ўзини ҳимоя қилиш мақсадида узган.