Месси Оқ уйда Трамп билан учрашди (видео)

Бугун, 6 март куни “Интер Майами” жамоаси сардори Месси ва жамоа аъзолари ўтган мавсум MLS кубогидаги ғалабасини нишонлаш учун Оқ уйга ташриф буюриб, АҚШ Президенти Дональд Трамп билан учрашди. 

“Интер Майами” жамоаsi 2025 йилнинг ноябрь ойида “Ванкувер Уайткэпс” устидан ғалаба қозониб, MLS кубокни қўлга киритган эди. Бу клубнинг 2020 йилда лигага қўшилганидан бери биринчи чемпионлиги ҳисобланади.

Трамп ўз нутқида кенжа ўғли – 19 ёшли Бэррон Трамп Мессининг, шунингдек жаҳон футболидаги унинг асосий рақибларидан бири Криштиану Роналдунинг ҳам мухлиси эканини айтиб ўтди.

“У сизнинг ашаддий мухлисингиз. У сизни ажойиб инсон деб ҳисоблайди. У сизнинг ҳам, Роналду исмли жентлменнинг ҳам мухлиси. Криштиану ҳам ажойиб футболчи. Сизлар буюк чемпионлар ва буюк спортчиларсиз”, деган Трамп.

Аргентиналик футболчи АҚШ етакчисининг нутқини қизиқиш билан тинглаган ва Роналду тилга олинган пайтда тадбирдаги бошқа меҳмонлар билан бирга кулиб юборган. Шунингдек, Трамп Лионель Мессини “Пеледан ҳам зўрроқ футболчи” деб ҳисоблашини ҳам таъкидлаган.

Маълумот учун, бу Мессининг Оқ уйга биринчи ташрифи бўлди, чунки у 2025 йил январь ойида собиқ президент Жо Байден томонидан берилган Президентлик медалини топшириш маросимида қатнаша олмаган эди.

Эслатиб ўтамиз, 2025 йилнинг 19 ноябрь куни Криштиану Роналду Саудия Арабистони валиаҳд шаҳзодаси ва Бош вазири Муҳаммад бин Салмоннинг АҚШга ташрифи муносабати билан Оқ уйда бўлиб ўтган тантанали кечки овқатда қатнашганди.