Мерц Германия канцлерлигига овоз йиғишда мағлуб бўлди

Германия канцлерлигига номзод Фридрих Мерц Германия бундестагида овоз бериш учун биринчи уринишда муваффақиятсизликка учради. Бу ҳақда “Bild” хабар берди.

Ҳукумат раҳбари бўлиш учун Мерц 316 депутатнинг қўллаб-қувватлашига эришиши керак эди. Бироқ овоз бериш жараёнида у бор-йўғи 310 та овоз тўплаган. “Қарши” деб 307 депутат овоз берган, уч нафари бетараф қолган. Битта бюллетень ҳақиқий эмас деб топилган.

Овоз беришнинг яна икки тури ўтказилиши мумкин. Германия қонунига кўра, агар канцлерликка номзод биринчи турда сайланмаса, бундестаг 14 кун ичида уни ёки бошқа номзодни мутлақ кўпчилик (316 овоз) билан сайлаши мумкин. Агар учинчи уринишда бундестаг бўлажак ҳукумат раҳбарини аниқлай олмаса, унда оддий кўпчилик овоз етарли бўлади.

Агар Мерц керакли миқдордаги овозларни тўплай олганида, у шу бугуноқ федерал ҳукумат бошлиғига айланарди.

“Bild” нашрининг ёзишича, айнан Германия Социал-демократик партияси депутатлари Мерцга қарши овоз берган бўлиши мумкин.

Маълумот учун, Германиянинг истеъфога чиқаётган канцлери Олаф Шольц яширин овоз беришнинг биринчи босқичида ғалаба қозонишга муваффақ бўлган – уни 736 депутатдан 395 нафари сайлаган.

Эслатиб ўтамиз, жорий йилнинг 5 май куни Берлиндаги Бендлерблок ҳарбий мажмуаси ҳовлисида Германия канцлери Олаф Шольц билан видолашув маросими бўлиб ўтган эди. Анъанавий “Буюк оқшом шон-шуҳрати” (Der Große Zapfenstreich) маросимида сўзлаган Шольц ҳамжиҳатликка, демократик қадриятларни асраб-авайлашга чақирган.