Мен ЧЛни бутун “Барса”дан кўпроқ марта ютганман – Модрич

Аввалроқ, “Барселона” – “Сеул” ўртоқлик ўйини (7:3) вақтида клуб телеканалида шарҳловчи Испания Кубоги финалида Лука Модрич томонидан йўл қўйилган хатони эслаб, киноя билан Модричнинг сўнгги ютуғи ўша ўйиндаги Кунде томон берган голли пасси эканини айтган эди. Ушбу гап ижтимоий тармоқларда тарқалганидан сўнг, Модрич ўз муносабатини билдирди.

“Мен Чемпионлар лигасини “Барселона” бутун тарихида ютганидан кўпроқ марта ютганман. Шунинг учун улар нима дейиши менга мутлақо аҳамиятсиз”, деган “Милан” аъзоси.

Маълумот учун, хорватиялик ярим ҳимоячи Лука Модрич Мадриднинг “Реал” жамоаси билан Чемпионлар лигасини 6 марта қўлга киритган. “Барселона” эса ўз тарихида бу мусобақани 5 марта ютган. 2025 йилнинг ёзида Модрич “Милан” сафига ўтди.

Эслатиб ўтамиз, 2025-йилги Испания Кубоги финалида “Барселона” “Реал”ни қўшимча бўлимда 3:2 ҳисобида мағлуб этган, ҳал қилувчи голни эса Жюль Кунде киритган.