Мексикада муниципалитет мэри ўз уйида отиб ўлдирилди

Номаълум шахслар Мексиканинг Оахака штати Сан-Мигел-Аматитлан муниципалитети мэри Хоэль Анхель Браво Мартинесни отиб ўлдирди. Бу ҳақда “El Universal” газетаси хабар берди.

Журналистларнинг маълумотларига кўра, воқеа кеча, 13 июнь куни эрталаб содир бўлган. Қуролланган гуруҳ 53 ёшли мэрнинг уйига бостириб кирган. Ҳудуд бош прокуратураси тергов ҳаракатларини бошлаган. Ушбу амалдор 22 май куни қўшни Пуэбла штатидаги трассада ҳам ҳужумга учраган: ўшанда номаълум шахслар пистирма қуриб, мэр ва унинг уч нафар ҳамроҳини машинадан тушишга мажбур қилган ва уларни тунаб кетган. 

Ушбу ҳолат юзасидан Оахака штати Бош прокуратураси тергов ҳаракатлари бошланганини маълум қилган.

“Штат Бош прокуратураси суриштирув ишларини техник ва илмий жиҳатдан қатъий назорат остига олади ҳамда ҳужум механизмини аниқлаш, жиноятнинг ижрочилари ва буюртмачиларини фош этиш, шунингдек, ушбу қотиллик бўйича жазонинг муқаррарлигини таъминлаб, қонуннинг қатъий қўлланилишини кафолатлаш учун идоралараро тезкор разведка кучларини бирлаштиради”, дея хабар берган прокуратура.

Эслатиб ўтамиз, аввалроқ футбол бўйича Эрон терма жамоасининг Мексиканинг Тихуана шаҳридаги машғулот базаси яқинидан чириган инсон жасади топилганди.