Мексика кемаси Нью-Йоркдаги Бруклин кўпригига урилди (видео)

Кеча, 17 май куни Мексика денгиз кучларига тегишли Cuauhtémoc елканли кемаси Нью-Йоркдаги Бруклин кўпригига урилди. Бу ҳақда “New York Post” хабар берди.

Маълум қилинишича, кема бортида 270 дан ортиқ киши бўлган. Кўприк билан тўқнашган кема устунининг бири синиб, кема палубрасига қулаб тушган. Шунингдек, бошқа устунлар ҳам шикастланган.

Нашр хабарига кўра, тахминан 10 киши жиддий жароҳатлар олган, уларнинг 3 нафари оғир аҳволда ва 2 киши ҳалок бўлган. CNN хабарида 20 киши жароҳатлангани айтилган.

Нью-Йорк мэри Эрик Адамс воқеани тасдиқлаб, 19 киши жароҳатланганини, улардан 4 нафарининг аҳволи оғир эканини билдирган. Кема капитани бошқарувни йўқотгани айтилган.

Маълумот учун, Cuauhtémoc кемаси 1981 йилда Испаниянинг Билбао шаҳрида қурилган, дастлаб Celaya номи билан танилган. Мексика денгиз кучлари бу кемани офицерлар, кадетлар ва денгизчилар учун ўқув кемаси сифатида сотиб олган. Кема Нью-Йоркка Sail4th елканли спорт мусобақасига тайёргарлик кўриш учун келган эди. Бу регата 2026 йилда АҚШнинг 250 йиллигига бағишланади.