Майдонга дадил тушинг, юрагингизни бериб ўйнанг – Саида Мирзиёева

Кеча, 22 май куни футбол бўйича Ўзбекистон миллий терма жамоасини Жаҳон чемпионатига кузатиш маросими бўлиб ўтди. Унда Ўзбекистон Президенти Администрацияси раҳбари Саида Мирзиёева ҳам иштирок этди. Бу ҳақда у ўзининг Telegram-каналида маълум қилди.

“Кеча Президентимиз Ўзбекистон миллий терма жамоасини Жаҳон чемпионатига кузатиш маросимида иштирок этдилар. Биз ҳам ўғлим билан ушбу қувончли лаҳзаларда уларга ҳамроҳ бўлдик. Юраклар ҳис-ҳаяжонига тўлиб тошган, чунки бу бутун Ўзбекистон учун чинакам тарихий воқеа – мамлакатимиз илк бор жаҳоннинг энг нуфузли мусобақасида қатнашади.

Ўғлимнинг кўзларида – қувонч ва фахр. Қўлида – қаҳрамонларимиз дастхати туширилган тўп, энди уни бебаҳо хазинадек асрайди. Қалбида бўлса миллий жамоамизга бўлган ишонч”, дейди Саида Мирзиёева.

Шунингдек, у футболчилардан майдонга дадил тушиб, юрагини бериб ўйнашни сўраган.

“Йигитлар, сиз аллақачон улкан маррани забт этдингиз – халқимиз қалбида орзу ва ишонч уйғотдингиз. Энди эса ўзбек футболи нималарга қодир эканини бутун дунёга кўрсатиб қўйинг. Майдонга дадил тушинг, юрагингизни бериб ўйнанг. Бугун кўча чангитиб тўп тепаётган, бир кун келиб миллий терма жамоа либосини кийишни орзу қилаётган ҳар бир болакай учун ўйнанг. Биз сизга ишонамиз. Бутун мамлакат сизга ишонади. Президентимиз сизга ишонади.

Олға, Ўзбекистон!” дейди Ўзбекистон Президенти Администрацияси раҳбари.

Эслатиб ўтамиз, аввалроқ Президент Шавкат Мирзиёев футбол бўйича Ўзбекистон миллий терма жамоасини 2026 йилги жаҳон чемпионатига кузатиш маросимида иштирок этгани ҳақида хабар берилган эди.