Maskning Starlink internet tarmog‘i Qozog‘istonda ishga tushdi

Bugun, 13 avgust kuni Starlink kompaniyasi Qozog‘iston hududida sun’iy yo‘ldosh orqali internet xizmatlarini rasmiy tarzda taqdim eta boshladi. Bu haqda mamlakatning Raqamli rivojlanish, innovatsiyalar va aerokosmik sanoat vazirligi xabar berdi.

Qayd etilishicha, bugun, 13 avgustdan boshlab Starlink kompaniyasi mamlakat hududida sun’iy yo‘ldosh internet xizmatlarini rasmiy ravishda taqdim etishni boshlagan.

“Buning natijasida mamlakat aholisi SpaceX kompaniyasiga tegishli past orbitadagi sun’iy yo‘ldoshlar tarmog‘i Starlink orqali yuqori tezlikdagi va ishonchli internetga ulanish imkoniga ega bo‘ladi. Starlink texnologiyasi hatto eng chekka va borish qiyin bo‘lgan hududlarda ham barqaror ulanishni ta’minlab, aholiga zamonaviy raqamli xizmatlardan foydalanish imkonini ochadi”, deyiladi bayonotda.

Starlink saytida Qozog‘iston hududidan internetga kirilgandagi tariflarni ham ko‘rish mumkin. Portal ma’lumotlariga ko‘ra, uy uchun internetga ulanishning eng kam oylik to‘lovi tezlik cheklovlari bilan 23 ming tenge (42 dollar), cheklovlarsiz esa 31 ming tenge (57 dollar) dan boshlanadi. Sayohatchilar uchun internet eng kamida 26 ming tenge (48 dollar) turadi, biroq bu narxga kompaniya 50 Gb trafik taklif qiladi, cheksiz trafik esa oyiga 52 ming tenge (96 dollar) dan boshlanadi. Saytda, shuningdek, sun’iy yo‘ldosh signali va internet tarmog‘iga ulanish uchun kerakli uskunani xarid qilish imkoniyati ham mavjud.

Amerika kompaniyasining respublika bozoriga chiqishiga imkon bergan kelishuv vazirlik va Starlink o‘rtasida joriy yilning iyun oyida imzolangan. Ungacha mamlakatda Starlink orqali internet ulanishi aholiga rasmiy ravishda mavjud bo‘lmagan, balki faqat uzoq hududlardagi maktablarni internetga ulash loyihasi doirasida sinov tariqasida ishlatilgan.

2024 yilda respublika hukumati mamlakat hududiga Starlink terminallarini olib kirishni taqiqlash masalasini ko‘rib chiqqan. Bunga xavfsizlik tahdidlari sabab qilib ko‘rsatilgan, chunki respublikada xorijdan boshqariladigan aloqa tarmoqlaridan foydalanish taqiqlangan. Biroq taqiqning kuchga kirgani haqida xabar berilmagan, shundan so‘ng hukumat kompaniya bilan uning Qozog‘iston qonunlariga rioya qilishi bo‘yicha kelishuvga erishganini ma’lum qilgan.

Ma’lumot uchun, Starlink – bu Starlink Services LLC tomonidan boshqariladigan sun’iy yo‘ldosh internet tizimi bo‘lib, u xalqaro telekommunikatsiya provayderi hisoblanadi va Amerikaning aerokosmik kompaniyasi Ilon Maskning SpaceX kompaniyasining to‘liq shu’ba korxonasi hisoblanadi. U hozirda taxminan 130 mamlakat va hududni qamrab oladi.

Eslatib o‘tamiz, o‘tgan yilning 30 oktyabr kuni Falcon 9 raketa-tashuvchisi global internet qamrov tizimi Starlink orbital guruhini to‘ldirish uchun yana 23 ta mini-sun’iy yo‘ldosh partiyasini orbitaga muvaffaqiyatli olib chiqqandi.