Машҳур Голливуд актёри рафиқаси билан ўз уйида ўлик ҳолда топилди

Жорий йилнинг 26 февраль куни икки карра “Оскар” мукофоти совриндори, 95 ёшли актёр Жин Хэкмен ва унинг рафиқаси 63 ёшли пианист Бетси Аракава ўз уйида ўлик ҳолда топилди. Бу ҳақда “Variety” хабар берди.

Нашрнинг ёзишича, уларнинг жасадларини актёрнинг Санта-Федаги уйидан икки нафар ишчи топган. Аракава ҳаммом полида ётган, шу ерда рецепт бўйича бериладиган дори-дармонлар ҳам сочилган ҳолда бўлган. Унинг ёнида итларидан бирининг жасади ҳам бўлган.

Ўлимнинг эҳтимолий сабаби сифатида газ сизиб чиқиши ҳолати текширилган. Аммо бундай ҳолат аниқланмаган,

“Газ сизиб чиқишига доир аниқ белгилар йўқ”, дейди терговчи Рой Арндт.

Шунингдек, кириш эшиги ҳам очиқ бўлган, бузиб киришга доир излар топилмаган. Арндтнинг сўзларига кўра, тергов Хэкмен ва унинг рафиқасининг ўлимини “жиддий текширувни талаб қиладиган даражада шубҳали” деб баҳоламоқда. Уларнинг аниқ қачон ва қандай шароитда вафот этгани ҳали маълум эмас. 

Маълумот учун, Жин Хэкмен 1930 йил 30 январда АҚШнинг Калифорния штати Сан-Бернардино шаҳрида туғилган. Узоқ йиллик фаолияти давомида у кўплаб нуфузли мукофотларни қўлга киритган. Хэкмен – икки карра “Оскар” ва BAFTA, уч карра “Олтин глобус” ва АҚШ Миллий кино танқидчилари кенгаши мукофотлари совриндори, Берлин кинофестивали ғолиби бўлган.

У илк бор “Оскар” мукофотини 1972 йилда Уилям Фридкиннинг “Француз алоқаси” драмасидаги бош роли учун олган. Иккинчи “Оскар” эса унга 1993 йилда Клинт Иствуднинг “Кечирилмас” вестернидаги иккинчи даражали роли учун топширилган. Катта экран юлдузининг кенг филмографиясида “Бонни ва Клайд” (1967), “Миссисипи олов ичида” (1988) каби фильмлар ҳам бор.

Хэкменнинг биринчи рафиқаси Фей Малтис бўлиб, улар 1956 йилда турмуш қурган ва уч фарзанд кўрган. Бироқ 30 йилдан сўнг уларнинг оиласи бузилган.

Актёр 1980 йилларда Санта-Фега кўчиб келган. У 1991 йилда Бетси Аракава билан турмуш қурган. Сўнгги йилларда Хэкмен бир неча китоб нашр эттирган.

Эслатиб ўтамиз, 2024 йил август ойида франциялик актёр Ален Делон оғир касаллик сабаб 88 ёшида вафот этган эди.