Машҳур Голливуд актёри ити учун 15 минг доллар сарфлагани маълум бўлди

Голливуднинг машҳур актёри, жангари фильмлардаги роллари билан танилган Сильвестр Сталлоне ити учун 15 минг доллар сарфлагани маълум бўлди. Бу ҳақда “The Voice Mag” хабар берди. 

Қайд этилишича, Сталлоне 1971 йилга қадар ҳозирги муваффақиятига эришмаган, театр ва телесериалларда кичик ролларни ижро этиш билан кифояланган. Бу ишлардан оладиган даромади ҳам барқарор бўлмаган. Ҳатто, актёр ўша пайтларда бир жуфт шим ва тешик пойабзалдан бошқа нарсаси бўлмаганини ҳам тан олган. Кунлардан бир куни унинг молиявий аҳволи шу қадар ёмонлашадики, озиқ-овқат сотиб олиш учун ўзининг Буткус лақабли кучугини 40 долларга сотишга мажбур бўлади. 

Ушбу қарорни қабул қилиш Сталлонега жуда қийин кечади. Чунки у итини жуда қадрлар эди. 

“У мени борлигимча яхши кўрадиган ягона тирик мавжудот эди”, дея эслайди Сильвестр Сталлоне. 

Аммо у итини унута олмайди. 1976 йилда катта экранларга чиққан “Рокки” фильми Сильвестр Сталлонега улкан шуҳрат келтиради. Фильм учта номинация бўйича Оскар мукофотига лойиқ кўрилади. Сталлоне фильм сценарийси учун гонорарни олиши билан итини сотиб олишга ошиқади. Бироқ унинг янги эгаси Буткуснинг Сталлоне учун жуда қадрли эканини билиб, итга 15 минг доллар нарх қўяди. 

У бу пулни дарҳол тўлаб, итини сотиб олади. Кейинчалик актёрнинг ўзи Буткус учун тўланган ҳар бир цент бунга арзиши ҳақида айтган. Сталлоне жониворга 1981 йил — итнинг вафотига қадар ғамхўрлик қилган.