Bir yilda to‘rtta “Oskar”? Sandra Xyuller tarix yozmoqchi

Germaniyalik aktrisa Sandra Xyuller bugungi kunda Gollivud va Yevropa kinosining eng ko‘p muhokama qilinayotgan aktrisalaridan biriga aylandi. U bir yilning o‘zida to‘rtta «Oskar» nominatsiyasini qo‘lga kiritishi mumkinligi aytilmoqda. Agar bu hodisa sodir bo‘lsa, u akademiya tarixida bunday natijaga erishgan ilk aktrisaga aylanishi mumkin. Bu haqda BBC xabar berdi.

So‘nggi yillarda “Yiqilish anatomiyasi” va “Qiziqish zonasi” filmlaridagi rollari bilan xalqaro shuhrat qozongan aktrisa endi birdaniga bir nechta yirik loyihalar markazida turibdi. Ayniqsa, “Project Hail Mary” va “Fatherland” filmlaridagi ijrosi kino muxlislari tomonidan yuqori baholanmoqda.

Kino sharhlovchisi Mark Xarrisonning aytishicha, Sandra Xyuller hozirgi davrning eng kuchli dramatik aktrisalaridan biriga aylangan.

“U kamera qarshisida hissiyotlarni juda tabiiy yetkazadi. Sandra Xyuller rol o‘ynamaydi - u obrazning ichida yashaydi”, dedi kino sharhlovchisi Mark Xarrison.

Ayniqsa, “Fatherland” filmidagi mehmonxona sahnasi allaqachon “kelajakdagi Oskar klipi” sifatida tilga olinmoqda. Filmda u yozuvchi Tomas Mannning qizi Erika Mann rolini ijro etgan. Sandra Xyuller sahnada oilasidagi fojiali voqea haqida telefon orqali xabar oladi. Aktrisaning qo‘rquv, iztirob va ichki bosimni tabiiy ifodalagani tomoshabinlarni hayratda qoldirgan.

Bundan tashqari, aktrisa Ryan Gosling bilan birga suratga tushgan “Project Hail Mary” filmida ham asosiy e’tibor markazida bo‘lishi kutilmoqda. Filmning ayrim sahnalari internetda muhokamalarga sabab bo‘lib ulgurgan.

Kino jurnalisti Anna Smit esa Xyullerning muvaffaqiyatini tasodif emasligini ta’kidladi.

“Uning kuchi - sun’iy dramatizmdan qochishida. Sandra tomoshabinni baland ovoz yoki ortiqcha emotsiya bilan emas, oddiy nigoh bilan ham larzaga sola oladi”, dedi Smit.

Aktrisa yil oxirigacha yana ikki yirik loyihada - “Digger” hamda avstriyalik “Rose” dramasida ko‘rinish beradi. Mutaxassislar aynan shu filmlar unga yana yangi nominatsiyalar olib kelishi mumkinligini taxmin qilmoqda.

48 yoshli Sandra Xyullerning Gollivuddagi katta muvaffaqiyati ko‘pchilik uchun “kech kelgan shuhrat”dek tuyulmoqda. Biroq kino ixlosmandlari uning iste’dodi aslida ancha oldin kashf etilganini aytmoqda. Ayniqsa, “Toni Erdmann” filmi aktrisaning xalqaro maydondagi ilk katta portlashi bo‘lgandi.

Endi esa Sandra Xyuller nafaqat Yevropa kinosining yuzi, balki “Oskar” tarixini o‘zgartirishi mumkin bo‘lgan aktrisaga aylanmoqda.