Машҳур блогернинг терговида янги рейд: катта миқдорда нақд пул топилди

Туркияда “Ванлик Қора Ҳайдар” лақаби билан танилган Меҳмет Фотих Танчалан бошчилигида фаолият юритган деб гумон қилинаётган жиноий гуруҳга қарши тергов доирасида яна 1 миллиард 541 миллион лира нақд пул топилди. Истанбулда аввалроқ аниқланган евро ва долларлар билан бирга мусодара қилинган пулларнинг умумий номинал қиймати 2 миллиард 475 миллион лирага етди. Иш доирасида 9 киши ҳибсга олинган. Бу ҳақда “Haberler” хабар берди.

Анқара Республика Бош прокуратураси жиноий йўл билан олинган мол-мулкни легаллаштириш гумони бўйича тергов олиб бормоқда. Тергов доирасида ҳибсга олинган Ҳакки Дўғаннинг кўрсатмаси асосида Анталиядаги савдо объектларидан бирида тинтув ўтказилган. Натижада 1 миллиард 541 миллион 395 минг лира миқдоридаги нақд пул топилган. Ҳозирда пулларнинг келиб чиқиши, ҳақиқийлиги ва жиноятга алоқадорлиги текширилмоқда.

Аввалроқ, Туркиянинг Ван шаҳрида ижтимоий тармоқларда машҳур бўлган мода дизайнери ва тадбиркор Чағли Ўз ҳамда “Ванли Қора Ҳайдар” лақаби билан танилган блогер Меҳмет Фотих Танчаланнинг тўйида уларга тақилган катта миқдордаги олтин ва пуллар текширувга сабаб бўлгани ҳақида хабар берилган эди. Келиннинг ўзига 52 килограмм олтин, куёвга эса 44 миллион турк лираси тақилгани айтилмоқда.

Шунингдек, жорий йилнинг 26 сентябрь куни Истанбулда иккита автомобилда ўтказилган тинтувларда 16 миллион 440 минг евро ва 700 минг АҚШ доллари аниқланган эди. Ўша пайтдаги валюта курси бўйича бу пулларнинг қиймати тахминан 934 миллион лирани ташкил этган.

Анталияда топилган пуллар ҳам ҳисобга олинса, тергов доирасида аниқланган маблағларнинг умумий номинал қиймати 2 миллиард 475 миллион 395 минг лирага етган.

Терговда яна бир муҳим тафсилот ҳам аниқланган. Гумонланувчилар қўлида бўлган хорижий валюталарнинг бир қисми қалбаки доллар ва евро бўлиши мумкин. Ҳозирда бундай банкнотларнинг миқдори ва улардан қандай мақсадларда фойдаланилганини аниқлаш бўйича текширув олиб борилмоқда.

Тергов прокуратурага мурожаат қилган бир шахснинг шикоятидан сўнг бошланган. Шикоятчи манбаси номаълум бўлган пуллар ноқонуний йўллар билан Туркияга олиб кирилгани ва мамлакат ичида ўтказилганини билдирган. Унинг айтишича, Меҳмет Фотих Танчалан видеоалоқалар вақтида унга катта миқдордаги нақд пулларни кўрсатиб, ишончини қозонган ва ундан пул олган. Шикоятчи бу ҳаракатларни фирибгарлик деб баҳолаган.

Қидирувга берилган Ҳакки Дўған қўлга олиниб, сўроқ қилинган. У ўз кўрсатмасида Танчалан хориждан ноқонуний йўллар билан олиб келингани айтилган пулларни Туркия ичида ўтказиш билан шуғулланганини билдирган. Дўғаннинг даъвосига кўра, Танчалан турли одамларга катта миқдордаги валютани кўрсатиб, пул ўтказмалари амалга оширилаётгани ҳақида таассурот уйғотган ва шу йўл билан улардан пул олган.

Жорий йилнинг 6 октябрь куни эса Танчалан бошқараётгани тахмин қилинаётган жиноий тузилмага қарши Анқара марказ бўлган ҳолда, бешта вилоятда бир вақтда операция ўтказилган. Натижада 10 нафар гумонланувчи қўлга олинган.

Кеча, 9 октябрь куни суд қарори билан Иззат Қоратош, Ўғузхон Икиз, Зайнилобиддин Танчалан, Фарҳод Пўлат, Нилгун Оя, Рамазон Тўғай, Жамол Куру ва Озон Демирел қамоққа олинган. Фотманур Танчалан эса суд назорати остида қолдирилган. Чағли Ўз Танчалан, Муҳаммад Саид Танчалан ва Эмина Чаканер каби бошқа гумонланувчиларга нисбатан текширув давом этмоқда.

Эслатиб ўтамиз, аввалроқ “Ванлик Қора Ҳайдар” лақаби билан танилган Меҳмет Фотиҳ Танчаланнинг рафиқаси Чағли Ўз Танчаланнинг прокуратурада берган кўрсатмалари маълум бўлган эди. У эрининг “тақинчоқлар ижарага олинган эди” деган баёнотини рад этиб, тилла буюмлар сотиб олинганини айтганди.