Марказий Осиёнинг яна бир давлати фуқароларига АҚШга кириш тақиқланиши мумкин

АҚШга кириши тақиқланиши мумкин бўлган давлатлар рўйхатига Миср, Қирғизистон ва яна 34 та давлат қўшилиши мумкин. Мамлакат Президенти Дональд Трамп маъмурияти уларга киришни чеклаш ёки визаларни беришни тўхтатиш масаласини кўриб чиқмоқда. Бу ҳақда “The Washington Post” нашри хабар берди.

Нашрга кўра, янги чекловлар рўйхатига 25 та Африка давлати, шунингдек, Миср ва Қирғизистон ҳам киради. АҚШ Давлат департаменти Давлат котиби Марко Рубио томонидан имзоланган махсус меморандумни дипломатик ходимларга юборган. Унда рўйхатдаги мамлакатларга янги талаб ва кўрсаткичларни бажариш учун 60 кунлик муддат берилган.

Меморандумдаги асосий сабаблар қуйидагилар:

• Айрим давлатларда “иштирокчи ва ҳамкорлик қилишга тайёр марказий ҳокимият йўқлиги”;
• Давлат органларида кенг тарқалган фирибгарлик ҳолатлари;
• АҚШ визасини олган фуқароларнинг муддатдан ошиқ мамлакатда қолиши;
• Инвестиция эвазига яшаш талабисиз фуқаролик берилаётган давлатлар мавжудлиги;
• Айрим давлатлардан келган шахсларнинг АҚШда “антисемитик ва антиамериканча фаолият” олиб боргани.

Меморандумда тилга олинган давлатлар рўйхати:

Ангола, Антигуа ва Барбуда, Бенин, Бутан, Буркина-Фасо, Кабо-Верде, Камбоджа, Камерун, Кот-д’Ивуар, Конго Демократик Республикаси, Жибути, Доминика, Эфиопия, Миср, Габон, Гамбия, Гана, Қирғизистон, Либерия, Малави, Мавритания, Нигер, Нигерия, Сент-Китс ва Невис, Сент-Люсия, Сан-Томе ва Принципи, Сенегал, Жанубий Судан, Сурия, Танзания, Тонга, Тувалу, Уганда, Вануату, Замбия ва Зимбабве.

Эслатиб ўтамиз, аввалроқ Трамп томонидан имзоланган яна бир фармонга кўра, 12 давлат, жумладан Туркманистон, Эрон ва Афғонистон фуқароларининг АҚШга кириши расман тақиқланган эди.

Шунингдек, март ойида ОАВ Трамп маъмурияти 43 давлат фуқароларига АҚШга кириш тартибини янада кучайтиришга тайёргарлик кўраётганини хабар қилганди. Ўшанда уч даражадаги чекловларни ўз ичига олган тавсиялар рўйхати ишлаб чиқилгани айтилган эди.