Марказий банк асосий ставкани яна ўзгаришсиз қолдирди

Марказий банк асосий ставкани 14 фоиз даражасида ўзгаришсиз қолдирди. Бу ҳақда Марказий банк бошқарувининг бугун, 29 июль куни бўлиб ўтган йиғилиши якунларида маълум қилинди.

Регулятор берган маълумотларга кўра, 2026 йил июнь ойида умумий инфляция йиллик 6,4 фоизга етган, базавий инфляция эса 5,7 фоиз даражасида ўзгаришсиз сақланиб қолган. Шунингдек, умумий инфляциянинг йил якунида 6,5 фоиз атрофида бўлиши, иқтисодий ўсиш прогнози эса 7,5–8 фоиз даражасида сақлаб қолингани қайд этилган.

Маълум қилинишича, жорий йилнинг июнь ойида энергия ва тошкўмир нархларининг ошиши таъсирида умумий инфляция суръатларининг қисқа муддатли юқорилаши кузатилмоқда. Марказий банкнинг пул-кредит сиёсати эса инфляцияни 5 фоизлик мақсадли даражага пасайтириш, макроиқтисодий барқарорликни таъминлаш ва аҳолининг харид қобилиятини сақлашга қаратилган бўлиб қолади.

Ахборотда айтилишича, асосий ставкани кўриб чиқиш бўйича навбатдаги йиғилиш 2026 йил 16 сентябрь кунига белгиланган.

Эслатиб ўтамиз, жорий йилнинг 17 июнь куни Марказий банк асосий ставкани 14 фоиз даражасида ўзгаришсиз қолдирган эди.