Марадона қўли билан гол урган тўп аукционга қўйилди

1986 йилги Жаҳон чемпионатининг Аргентина ва Англия ўртасидаги чорак финал ўйини иккинчи бўлимида ўйналган Adidas Azteca тўпи Heritage аукционига қўйилди. Бу ҳақда “My Seldon” хабар берди.

Қайд этилишича, айнан шу тўп билан Диего Марадона аввал қўли билан гол урган, 4 дақиқадан сўнг эса Англия терма жамоасининг ярмини алдаб ўтиб, “аср голи”ни расмийлаштирган. Деярли 40 йил ичида тўпнинг анча ҳавоси чиққан ва шаклини йўқотган, аммо нархи арзонлашгани йўқ.

Савдо 2,5 миллион доллардан бошланади, лот учун эса 10 миллион долларгача маблағ йиғиш режалаштирилмоқда.

2022 йилда тўп 2,37 миллион долларга сотилган, яъни эндиликда нарх тўрт баравардан кўпроққа ошиши мумкин. Агар харидор топилса, ҳавоси чиққан тўп Диего Марадонанинг ўша ўйиндаги, 9,2 миллион долларга сотилган футболкасидан ҳам қимматроқ бўлиб чиқади.

Маълумот учун, Диего Армандо Марадона футбол тарихидаги энг буюк ва бетакрор ўйинчилардан бири бўлиб, у 1960 йил 30 октябрда Аргентинанинг Буэнос-Айрес шаҳри яқинида дунёга келган ва 2020 йил 25 ноябрда 60 ёшида вафот этган. Унинг футболчилик фаолиятидаги энг юқори чўққиси 1986 йилги Жаҳон чемпионатига тўғри келади. Ўшанда у сардор сифатида Аргентина терма жамоасини жаҳон чемпионлигига бошлаб борган.

Клублар миқёсида Марадона Аргентинанинг “Бока Хуниорс” ва Испаниянинг “Барселона” жамоаларида тўп сурган бўлса-да, унинг энг ёрқин ва муваффақиятли йиллари Италиянинг “Наполи” клуби билан боғлиқ. У ўртамиёна ҳисобланган Неаполь клубини ўз ортидан эргаштириб, икки бор Италия чемпионлиги ва UEFA кубогини олиб берган. Бу эса уни маҳаллий мухлислар учун ҳақиқий афсонага айлантирган. Бутун фаолияти давомида ўзининг ноёб дриблинги, тезкорлиги ва майдонни кўра олиш қобилияти билан ажралиб турган Марадона FIFA томонидан Пеле билан бир қаторда 20-асрнинг энг яхши футболчиси деб эълон қилинган. Футболчилик фаолиятини якунлагач, у мураббийлик билан ҳам шуғулланган ва 2008-2010 йилларда Аргентина терма жамоасини бошқарган.

Эслатиб ўтамиз, аввалроқ Диего Марадонанинг 1986 йилги Жаҳон чемпионатида таққан сардорлик боғичи кимошди савдосида 512 минг долларга сотилганди.