Марҳум Линдси Грэм ўрнига унинг синглиси АҚШ Сенатига тайинланди

АҚШ Президенти Дональд Трамп тавсия қилган Дарлин Грэм Нордон марҳум акаси Линдси Грэмнинг ўрнига АҚШ Сенатига тайинланди. Бу ҳақда “The Guardian” хабар берди.

Маълум қилинишича, Дарлин Грэм Нордон 2027 йилгача, яъни Линдси Грэмнинг 2020 йилда бошланган тўртинчи сенаторлик муддати якунлангунга қадар АҚШ Сенатида фаолият юритади.

Матбуот анжуманида сўзга чиққан Жанубий Каролина губернатори Макмастер Линдси Грэмни ўрнини ҳеч ким боса олмайдиган ва ғайриоддий инсон деб атаб, унинг синглиси акасининг ишини давом эттиришига ишонч билдирган.

64 ёшли Дарлин Грэм Нордон эса Сенатда Дональд Трампнинг сиёсатини қўллаб-қувватлашини ва акаси бошлаган ишларни давом эттиришини маълум қилган.

“Келгуси бир неча ой давомида Президентни қўллаб-қувватлаш ва акам Жанубий Каролина ҳамда АҚШ фуқаролари манфаатлари йўлида бошлаган ишларни давом эттириш учун астойдил меҳнат қилишга ваъда бераман. Менимча, Линдси ҳам шуни истаган бўларди”, деган у.

Дарлин Грэм Нордон ҳозирда Жанубий Каролина Кўзи ожизлар комиссияси аъзоси ҳисобланади. У оптик мутахассис бўлиб, аввал Клемсон университети ҳамда штатнинг Бандлик ва меҳнат ресурслари департаментида ишлаган. Шунингдек, Кўзи ожизлар бўйича штат агентликлари миллий кенгашининг сайланган президенти ҳисобланади.

Маълум бўлишича, Дарлин Грэм Нордон ўсмирлик даврида ота-онасидан айрилганидан сўнг, Линдси Грэм унга отадек ғамхўрлик қилган. Шу боис унинг Сенатдаги ўринни эгаллаши республикачилар ва демократлар томонидан илиқ кутиб олинган.

Эслатиб ўтамиз, жорий йилнинг 11 июль куни америкалик сенатор Линдси Грэм 71 ёшида вафот этган эди. Кейинчалик АҚШ сенатори Линдси Грэм атеросклероз оқибатида юзага келган аорта ёрилиши сабаб вафот этгани маълум бўлган. Шунингдек, россиялик пропагандачи файласуф Александр Дугин АҚШ сенатори Линдси Грэмнинг тўсатдан вафоти ортида Исроилнинг ташқи разведка хизмати – “Моссад” турган бўлиши мумкинлигини даъво қилганди.