Мандат қачон эълон қилинади? 

Ижтимой тармоқларда 2025-2026 ўқув йили учун олий таълим муассасаларига кириш тест синовларининг якуний натижалари (мандат) жорий йилнинг 15 август ёки 16 август куни эълон қилиниши ҳақида хабарлар тарқалди. QALAMPIR.UZ ҳолатга аниқлик киритиш мақсадида Олий таълим, фан ва инновациялар вазирлиги матбуот котиби Назокат Абдуқундузова билан боғланди. 

Унинг сўзларига кўра, тест натижалари имтиҳонлар тўлиқ якунланганидан сўнг 7 кун ичида эълон қилиниши керак ва бу айнан 15 август кунига тўғри келади. 

Қайд этиш жоиз, таълим йўналишларини танлаш жараёни 25 июлдан 8 августга қадар давом этди.

Абитуриентларнинг талабаликка тавсия этилган ёки этилмаганини билдирувчи натижалар эса 8 августдан кейин бир ҳафта ичида, яъни 15 августга қадар эълон қилиниши керак. Ушбу сана техник сабаблар туфайли бир кун кечикиши ҳам мумкин. 

2024 йилда таълим йўналишларини танлаш жараёни 27 июлдан 10 августга қадар бўлиб ўтган ва якуний мандат 17 августда эълон қилинганди.

Бу тажрибага таянилса, 2025 йилда ҳам якуний танлов натижалари 15 август куни эълон қилиниши кутилмоқда.