Макгрегор октагонга қайтмоқда. У Оқ уйда жанг қилади

37 ёшли собиқ ярим енгил (-66 кг) ва енгил (-70 кг) вазн тоифаларида UFC’нинг икки карра чемпиони, ирландиялик Конор Макгрегор навбатдаги жангини америкалик Майкл Чандлерга қарши ўтказади. Бу ҳақда у “Fox News” телеканалига берган интервьюсида маълум қилди.

Жанг 2026 йилнинг июнь ойи охирида АҚШ Президентининг расмий резиденцияси – Оқ уй ҳудудида бўлиб ўтадиган UFC турнирида ташкил этилади.

“Мен майдондаман, Майкл Чандлер билан жанг қиламан. Биз у билан The Ultimate Fighter шоусида бирга қатнашганмиз. У яхши йигит”, дейди Макгрегор.

Эслатиб ўтамиз, ирландиялик жангчи аралаш яккакураш қоидалари бўйича охирги марта 2021 йил июлида UFC 264 турнирида октагонга чиққан эди. Ўшанда у енгил вазн тоифасида UFC нинг собиқ вақтинчалик чемпиони америкалик Дастин Порега биринчи раундда (оёқ жароҳати сабабли) техник нокаут билан ютқазган эди. Унинг профессионал рекордида жами 22 ғалаба ва олти мағлубият бор.