Макгрегор октагонга қайтишга ваъда берди

Икки вазн тоифасида UFC’нинг собиқ чемпиони Конор Макгрегор UFC 329 турнирида Макс Холлоуэйга қарши кечган жангдаги мағлубиятдан сўнг фаолиятини давом эттириш ниятида эканини маълум қилди. Бу ҳақда у ўзининг X саҳифасида ёзиб қолдирди.

Кеча, 12 июль куни бўлиб ўтган жангда Макгрегор оёғидан жароҳат олиб, техник нокаут билан мағлуб бўлди. Жанг бошида у ноқулай тарзда оёғидан жароҳат олди. Шу боис ҳакам баҳсни муддатидан аввал тўхтатишга қарор қилди.

“Мен ажойиб формада эдим ва бу жангга жуда яхши тайёргарлик кўргандим. Ҳалигача бу воқеага ишона олмаяпман. Мен тайёр эмас эдим, деган ҳар қандай гап мутлақо бемаънилик. Мен хотиржам, тайёр ва ўзига ишонган ҳолда октагонга чиққан эдим. Ҳозиргача нима бўлганини англай олмаяпман. Гўё шайтон кўзимга тикилиб тургандай. Лекин мен у билан курашмайман. Бу синовдан ўтаман, йўлимдан адашмайман ва албатта қайтаман”, деб ёзди Макгрегор.

UFC президенти Дэйна Уайт эса Макгрегорнинг олдинги крестсимон бойлами (ACL) узилган бўлиши мумкинлигини маълум қилди.

37 ёшли Макгрегор беш йиллик танаффусдан кейин аралаш яккакурашлар (MMA)га қайтган эди. Унинг ҳисобида ҳозиргача 22 та ғалаба ва 7 та мағлубият бор. Ирландиялик аввал UFC’нинг ярим енгил ҳамда енгил вазн тоифаларида чемпионлик камарларини қўлга киритган.

34 ёшли Макс Холлоуэй эса фаолияти давомида 28 та ғалаба ва 9 та мағлубият қайд этган.