Мадримов декабрь ойида Тошкентда рингга кўтарилади

Профессионал бокснинг биринчи ўрта вазн тоифасида WBA йўналишининг 2-рақамли жангчиси Исроил “Тhe Dream” Мадримовнинг (7-0-0) жорий йил 11 декабрь куни франциялик Мишель Сорога (35-2-1) қарши ўтказадиган жангига Тошкент шаҳри мезбонлик қилади. 

Мукофот жамғармаси 245 минг долларни ташкил этади. WBA рейтингининг биринчи рақамли чарм қўлқоп устаси Мишель Соро юқоридаги сумманинг 60 фоиз (147 минг АҚШ доллари), Исроил Мадримов эса 40 фоизини (98 минг АҚШ доллари) қўлга киритади.  

Мадримов ва Соро жанги ғолиби WBА (супер) камари учун расмий даъвогарга айланади. “Мир Бокса” ва “Маtchroom Boxing” компаниялари томонидан ташкил этиладиган жангни ўтказиш учун АҚШнинг Лас-Вегас ва Кливленд шаҳарлари ҳам кураш олиб борган. 

Эслатиб ўтамиз, биринчи ўрта вазн тоифасида WВА, WВC ва IBF камарлари соҳиби Жермелл Чарло (34-1-1, 18 КО) ҳисобланади. У жорий йилнинг июль ойида мутлақ Жаҳон чемпионлиги учун бўлиб ўтган жангда WBО чемпиони Браян Кастаньо (17-0-2, 12 КО) билан баҳс олиб борган ва ушбу беллашув дуранг натижа билан якунланганди.