Аёлларни паспортга рўмолини ечиб тушишга мажбурлашни тўхтатиш керак – Алишер Қодиров

Олий Мажлис Қонунчилик палатаси депутати, “Миллий тикланиш” демократик партияси фракциясининг раҳбари Алишер Қодиров рўмол ўраган аёлларни паспорт учун расмга рўмолини ечиб тушишга мажбурлашни тўхтатиш кераклигини айтди. Бу ҳақда у америкалик мегаюлдуз Женнифер Лопезнинг Тошкентдаги концертидан кейин бошланган мунозаралар фонида бугун, 8 август куни ўзининг Telegram-каналида пост қолдирди.

“Женнифер Лопезнинг концерти сердаромад иш ва ёпиқ тадбир, наркотика тарқатиб, давлатга қарши тарғибот қилмаса, ўтказади, танасини кўрсатиш уни танлови, кўриш эса тадбирга билет олганларники, дунёвийлик шу! 

Лекин, худди шундай ўраниб юрмоқчи бўлган аёл ватандошни ҳам танлови қонун билан ҳимоя қилинган. Ялонғоч намойишини дунёвийлик деб қабул қилдик, энди ёпиниб юриш ҳуқуқига ҳам даҳл қилмаслик кераклигини қабул қилайлик. Лопезга қандай кийинишни ўргатмаганимиздек, эътиқодли аёлларимизга рўмолни қандай ўрашни ўргатишни, қолаверса, шу ёшга келиб эътиқоди талабига риоя қилган аёлларни паспортга рўмолини ечиб тушишга мажбурлашни ҳам тўхтатиш керак”, дейди депутат.

Шунингдек, у идентификация талаблари юзни очиқ бўлишини тақозо қилишини, лекин сочни эмаслигини таъкидлаб, Лопезга кўрсатган бағрикенгликни диндор аёлларга ҳам кўрсатишга чақирган. 

“Дунёвийлик ишонганга ҳам, ишонмаганга ҳам тенг бўла олиш дегани, зўрни заифга ҳаётдан дарс бериши эмас.

Лопез рақсини тушуниш учун Маркесни дунё фалсафасини ўқиган бўлиш керак…” дейди Қодиров.

Депутат Ўзбекистоннинг дунёвий давлат экани тортишилмаслигини, дунёвий давлат кўпчилик сайлаган парламент томонидан қабул қилиниб, кўпчилик сайлаган Президент томонидан мақулланган қонунларни бузмаган ҳолда, ўзи истаганидек яшаш имконини беришини урғулаган.

“Ватанимизда барча миллат ва дунёқарашдаги ватандошлар эмин-эркин, қонунларни бузмаган ҳолда фаровонликка интилиши учун шароит яратиш устувор мақсад эканлиги мустаҳкам белгиланган. Ҳамма тенг ва ҳеч ким камситилмаслиги кафолатланган. 

Агар бирон ватандош пиво ичмоқчи бўлса, ичади, бу унинг танлови, ичмайдиган ватандош ичмайди ва бунинг сабабини ҳар икки тоифа ҳеч кимга изоҳ беришга мажбур эмас. 

Алкоголни ичиш мумкин, лекин реклама қилиш мумкинмас, бу амалдаги қонунда белгиланган, албатта, парламент сайловларини мутлақо ютадиган бирон сиёсий куч қонунни ўзгартириб алкоголни “миллий қадрият”, бир жинслиларни оила қуриш талабини эса эркин танлов сифатида норма қилиши ҳам мумкин, бунга сиз ҳуқуқ берасиз…

“Миллий тикланиш” ҳар қандай тараққиётни қадриятларга таяниши керак деган ғоясида мустаҳкамлигини эслатиб қўймоқчиман”, дейди партия етакчиси.

Эслатиб ўтамиз, кеча, 7 август куни Женнифер Лопез “Up All Night – Live in 2025” сайёр чиқишлари доирасида Ўзбекистонда чиқиш қилди. Унинг концерт дастури эса Тошкентдаги Ўзбекистон миллий терма жамоасининг асосий ўйинлари ўтказиладиган, шунингдек, “Бунёдкор” клубининг уй майдони ҳисобланувчи “Бунёдкор” стадионида ўтказилди.