Лондонда Ассанж тарафдорлари намойишга чиқди

Лондонда Британия расмийларининг WikiLeaks асосчиси Жулиан Ассанжни АҚШга экстрадиция қилиш қарорига қарши митинг бўлиб ўтди. Британия пойтахти рамзларидан бири саналган эски қизил автобусга “Ассанжга эркинлик”, “Журналистика жиноят эмас” ва “Ассанжни экстрадиция қилманг” деган баннерлар осилган эди. 

Ички ишлар вазирлиги биноси ёнида тўпланган Ассанж тарафдорлари журналистни ҳимоя қилиш учун қисқа нутқлардан сўнг автобусга ўтирди ва машина парламент томон ҳаракатланди. 

Ўша пайтда автобусда Ассанжнинг отаси Жон Чиптон, унинг укаси Габриел Чиптон, австралиялик тадқиқотчи журналист Жон Пилгер ва қўшиқчи Девид Ровикс ҳам бўлган. 

Акция иштирокчилари шу тариқа 1972 йил 3 июлда туғилган Ассанжнинг туғилган кунини ўзига хос тарзда нишонлашди. 

Ички ишлар вазирлиги олдига йиғилган намойишчилардан бири Ассанжнинг ҳақиқатни айтгани учун ҳибсга олинганини айтиб, нутқини қуйидаги сўзлар билан давом эттирди:  

“Ассанж шунчаки уруш жиноятларини фош этмади. У жосуслик, экологик офатлар каби кўплаб муаммоларни кўтарган. Агар Ассанж буни ошкор қилмаганида, ҳеч ким бу ҳақда билмас эди. Ҳаммамиз Ассанждан қарздормиз. Биз унинг озодлиги учун курашишимиз керак”. 

20 апрель куни Вестминстер магистратура суди Ассанжни экстрадиция қилиш тўғрисида қарор чиқарди ва иш ички ишлар вазири Прити Пателга топширилди. 

Пател 17 июн куни Ассанжни АҚШга экстрадиция қилиш ҳақидаги қарорни имзолади. 

Ўз навбатида WikiLeaks апелляция шикояти беришини маълум қилди.

Ассанж иши 

Қўшма Штатларда 50 ёшли австралиялик Жулиан Ассанж Америка тарихидаги махфий маълумотларни ошкор қилишнинг энг йирик иши билан боғлиқ жиноятларда айбланмоқда. Унга қўйилган айбловлар бўйича 175 йиллик қамоқ жазоси берилиши мумкин. Ўтган ой Лондондаги Вестминстер магистратура суди Олий суд қароридан сўнг, Ассанжни АҚШга экстрадиция қилиш тўғрисида қарор чиқарган эди. Охирги уч йил давомида Ассанж Лондоннинг Белмарш юқори хавфсизлик қамоқхонасида сақланмоқда.

Жорий йилнинг январь ойида Лондондаги Вестминстер магистратура суди WikiLeaks асосчисининг экстрадиция қилинишини ноқонуний деб топди, чунки аутизм ва клиник депрессиядан азият чекаётган Ассанж АҚШ қамоқхонасига тушиб қолса, ўз жонига қасд қилишга тайёр. Бу Ассанжни АҚШга экстрадиция қилишдан бош тортиш учун асос бўлди, у ерда унга қарши 18 та жиноий иш қўзғатилди, аммо бу қарор АҚШ Адлия вазирлиги томонидан эътирозга учради.

Ўтган йилнинг декабрь ойида австралиялик адвокатлар Буюк Британия Олий судида қабул қилинган қарор устидан шикоятни кўриб чиқишни сўраб Лондон Олий судига мурожаат қилишган. 24 январь куни Лондон Олий суди қарор устидан Буюк Британия Олий судига шикоят қилиниши мумкинлиги ҳақида қарор чиқарди. 15 март куни олий суд журналистни бу ҳуқуқдан маҳрум қилди. Экстрадиция бўйича якуний қарорни Ички ишлар вазири Пател қабул қилиши керак эди.

Жулиан Ассанж – австралиялик журналист ва телебошловчи ва “WikiLeaks” асосчиси. 

Маълумот ўрнида, Жулиан Ассанж 2010 йилда Швецияда жинсий зўрлаш номусга тегишда айбланган эди. 2012 йил июнь ойидан бери у Лондондаги Эквадор элчихонаси ҳудудида яшириниб юрди ва 2019 йил апрель ойида АҚШ сўровига биноан ҳибсга олинди. Лондон суди Ассанжни гаров шартларини бузганликда айбдор деб топди ва уни 11 ой қамоқ жазосига ҳукм қилди.

Америка Қўшма Штатларида у жосуслик тўғрисидаги 18 та қонунни бузганликда, шунингдек, махфий маълумотларни ошкор қилганликда айбланмоқда.