Ливан Эрон элчисини мамлакатдан чиқариб юборишга қарор қилди

Ливан Ташқи ишлар вазирлиги Эроннинг Байрутдаги элчисининг аккредитациясини бекор қилиб, уни “персона нон грата” деб эълон қилди. Бу ҳақда вазирликнинг расмий сайтида хабар берилди.

Расмий баёнотга кўра, дипломат ҳафта охиригача мамлакатни тарк этиши керак.

Маълум қилинишича, вазирлик Эроннинг Ливандаги муваққат ишлар вакили Тавфиқ Самади Хошҳони чақириб, унга ушбу қарорни етказган. Қарорга кўра, Эроннинг тайинланган элчиси Муҳаммад Ризо Шайбонийнинг аккредитацияси бекор қилинган.

Шунингдек, Ливан ўзининг Теҳрондаги элчисини маслаҳатлашувлар учун чақириб олган. Бу қарор Ливан томонидан Эроннинг дипломатик муносабатлар нормаларини бузган деб баҳоланиши фонида қабул қилинган.

Бундан ташқари, Ливан ТИВ Бирлашган Араб Амирликларига қарши “террорчилик фитнаси”ни кескин қоралаб, унда “Ҳизбуллоҳ” иштирок этганини танқид қилган.

Эслатиб ўтамиз, аввалроқ Исроилнинг шимолий ва марказий ҳудудлари кенг кўламли ракета ҳужумига учраганди. Исроил Мудофаа армияси маълумотига кўра, мамлакат ҳудудига “Ҳизбуллоҳ” томонидан тахминан 150 та ракета учирилган. Ислом инқилоби қўриқчилари корпуси баёнот бериб, Исроилга ҳужум “Ҳизбуллоҳ” билан ҳамкорликдаги ва мувофиқлаштирилган операция эканлигини айтган. Исроил расмийлари бу маълумотни тасдиқламаган.