Квентин Тарантинонинг сўнгги фильмидa Брэд Питт бош ролни ўйнаши мумкин

Режиссёр Квентин Тарантино актёр Брэд Питтни “Кинотанқидчи” фильмида роль ўйнашга таклиф қилди. Бу ҳақда “Deadline” ва “The Hollywood Reporter” ўз манбаларига таяниб, хабар берди.

Унга кўра, режиссёр Квентин Тарантино “Кинотанқидчи” фильмини суратга олмоқчи ва бош ролда машҳур актёр Брэд Питтнинг ижроси кутилмоқда. 

“Deadline” нашри муаллифи Майк Флемингнинг фикрича, Питт қандай роль ўйнаши номаълум. “Screen Rant“ нашрининг ёзишича, Тарантино асосий ролга 35 ёшгача бўлган актёрни таклиф қилмоқчи. (Питт 2023 йилда 60 ёшга тўлган). Нашрнинг таъкидлашича, ”Кинотанқидчи” фильми 30 ёшида вафот этган одамнинг ҳикоясига асосланган.

“The Hollywood Reporter” нашрининг билдиришича, 2023 йил мартида Тарантино “Кинотанқидчи” фильми сценарийси устида ишлашни тугатганини хабар берганди. Фильм 1977 йилда Калифорнияда бўлиб ўтади ва у ҳақиқатан ҳам яшаган, лекин ҳеч қачон машҳур бўлмаган ва у порнографик журналлар учун фильм шарҳлари ёзган одамнинг ҳикоясига асосланган. Айни пайтда Питт ва Тарантино шартнома имзолагани аниқ эмас. 

Тарантинонинг айтишича, у журналларидан бирида уларга истеҳзоли ва ақлли ёзган бир танқидчининг мақолалари ёққан ва шундан илҳомланган.

“Кинотанқидчи” фильмини суратга олиш шу йил охирида ёки 2025 йилда бошланиши кутилмоқда.

Мадина Отабоева